sar-kashi ko jab humne ham-rikab rakhna hai

sar-kashī ko jab ham ne ham-rikāb rakhnā hai

TūTne bikharne kā kyā hisāb rakhnā hai

ek ek saa.at meñ zindagī samonī hai

ek ek jazbe meñ inqalāb rakhnā hai

raat ke añdheroñ se jañg karne vāloñ ne

sub.h kī hathelī par āftāb rakhnā hai

ham pe us se vājib haiñ koshisheñ baġhāvat kī

tum ne jis qabīle ko kāmyāb rakhnā hai

rakh do ham faqīroñ kī is kushāda jholī meñ

apnī bādshāhī kā jo azaab rakhnā hai

tum to ḳhud zamāne meñ jabr kī alāmat ho

tum ne jabr kyā zer-e-ehtisāb rakhnā hai

shahr-e-be-amāñ ham ne naqd-e-jāñ luTā kar bhī

tere har darīche par kal kā ḳhvāb rakhnā hai

sar-kashi ko jab hum ne ham-rikab rakhna hai

TuTne bikharne ka kya hisab rakhna hai

ek ek saat mein zindagi samoni hai

ek ek jazbe mein inqalab rakhna hai

raat ke andheron se jang karne walon ne

subh ki hatheli par aaftab rakhna hai

hum pe us se wajib hain koshishen baghawat ki

tum ne jis qabile ko kaamyab rakhna hai

rakh do hum faqiron ki is kushada jholi mein

apni baadshahi ka jo azab rakhna hai

tum to KHud zamane mein jabr ki alamat ho

tum ne jabr kya zer-e-ehtisab rakhna hai

shahr-e-be-aman hum ne naqd-e-jaan luTa kar bhi

tere har dariche par kal ka KHwab rakhna hai