sar mein rah-e-ishq par chalne ka hai sauda abhi

sar meñ rāh-e-ishq par chalne kā hai saudā abhī

kaun sī manzil hai merī ye nahīñ sochā abhī

fart-e-ġham meñ muskurānā to bahut dushvār hai

mujh ko rone kā salīqa bhī nahīñ aaya abhī

hāl-e-dil ho jā.egā ḳhud ek din un par ayaañ

maslahat is meñ bhī hai qaa.em rahe parda abhī

maiñ to dil par choT khā kar zabt se ḳhāmosh thā

ashk-ālūda magar thā kyoñ ruḳh-e-zebā abhī

vo nahīñ samjhegā kyā haiñ talḳhiyoñ meñ lazzateñ

jis ne apne dost se dhokā nahīñ khāyā abhī

jurm kuchh baḳhsheñge vo kuchh kī sazā mil jā.egī

tū mujhe kyoñ khaa.e jaatā hai ġham-e-fardā abhī

tifl-e-maktab huuñ 'shifā' mai-ḳhāna-e-‘maḳhmūr’ meñ

zeb dete haiñ mujhe kab sāġhar-o-mīnā abhī

sar mein rah-e-ishq par chalne ka hai sauda abhi

kaun si manzil hai meri ye nahin socha abhi

fart-e-gham mein muskurana to bahut dushwar hai

mujh ko rone ka saliqa bhi nahin aaya abhi

haal-e-dil ho jaega KHud ek din un par ayan

maslahat is mein bhi hai qaem rahe parda abhi

main to dil par choT kha kar zabt se KHamosh tha

ashk-aluda magar tha kyon ruKH-e-zeba abhi

wo nahin samjhega kya hain talKHiyon mein lazzaten

jis ne apne dost se dhoka nahin khaya abhi

jurm kuchh baKHshenge wo kuchh ki saza mil jaegi

tu mujhe kyon khae jata hai gham-e-farda abhi

tifl-e-maktab hun 'shifa' mai-KHana-e-‘maKHmur’ mein

zeb dete hain mujhe kab saghar-o-mina abhi