sar-nigun husn pe ho ishq sar-afraaz na ho

sar-nigūñ husn pe ho ishq sar-afrāz na ho

lan-tarānī kā sar-e-tūr yahī raaz na ho

ham samajhne hī se ma.azūr rahe hoñ shāyad

lab pe ġhunche ke kahīñ terī hī āvāz na ho

parda dar parda hijābāt meñ rahne vaale

ġhair-mumkin hai ki jab soz to ho saaz na ho

bāġh-e-ālam meñ ye āvārgī-e-nik.hat-e-gul

terī zulfoñ ke hasīñ kaif kā e.ajāz na ho

ishq rangīn batā detā hai duniyā-e-hayāt

mastī-e-husn-e-nazar kā tirī e.ajāz na ho

tere dīvāna-e-ulfat ke liye mauzūñ hai

aisā aalam jo kisī aur kā dam-sāz na ho

'jauhar' us ā.ina-ruḳhsār kī mahfil meñ kahīñ

iztirābī dil-e-betāb kī ġhammāz na ho

sar-nigun husn pe ho ishq sar-afraaz na ho

lan-tarani ka sar-e-tur yahi raaz na ho

hum samajhne hi se mazur rahe hon shayad

lab pe ghunche ke kahin teri hi aawaz na ho

parda dar parda hijabaat mein rahne wale

ghair-mumkin hai ki jab soz to ho saz na ho

bagh-e-alam mein ye aawargi-e-nikhat-e-gul

teri zulfon ke hasin kaif ka eajaz na ho

ishq rangin bata deta hai duniya-e-hayat

masti-e-husn-e-nazar ka teri eajaz na ho

tere diwana-e-ulfat ke liye mauzun hai

aisa aalam jo kisi aur ka dam-saz na ho

'jauhar' us aaina-ruKHsar ki mahfil mein kahin

iztirabi dil-e-betab ki ghammaz na ho