sar par hamare bar-e-digar kaun de gaya

sar par hamāre bār-e-digar kaun de gayā

āḳhir safar meñ raḳht-e-safar kaun de gayā

vo aadmī hai kitne parindoñ kā aasrā

us aadmī ko tarz-e-shajar kaun de gayā

maqtal meñ bahas kā hai yahī mudda.ā abhī

dastār ko sañbhāl ke sar kaun de gayā

baiThe hue haiñ shāḳh pe ḳhushbū sameT kar

titlī ko in guloñ kī ḳhabar kaun de gayā

jugnū charāġh chāñd na taara koī yahāñ

dīvār-e-shab-siyāh meñ dar kaun de gayā

kal ek but ne mujh se kiyā thā yahī savāl

patthar tarāshne kā hunar kaun de gayā

'rākesh' roz kahtā hai 'dilbar' se āj-kal

mujh ko ġhazal ke zer-o-zabar kaun de gayā

sar par hamare bar-e-digar kaun de gaya

aaKHir safar mein raKHt-e-safar kaun de gaya

wo aadmi hai kitne parindon ka aasra

us aadmi ko tarz-e-shajar kaun de gaya

maqtal mein bahas ka hai yahi muddaa abhi

dastar ko sanbhaal ke sar kaun de gaya

baiThe hue hain shaKH pe KHushbu sameT kar

titli ko in gulon ki KHabar kaun de gaya

jugnu charagh chand na tara koi yahan

diwar-e-shab-siyah mein dar kaun de gaya

kal ek but ne mujh se kiya tha yahi sawal

patthar tarashne ka hunar kaun de gaya

'rakesh' roz kahta hai 'dilbar' se aaj-kal

mujh ko ghazal ke zer-o-zabar kaun de gaya