sar pe jo saeban mayassar hai

sar pe jo sā.ebāñ mayassar hai

sab ko ye bhī kahāñ mayassar hai

kaise kah duuñ ki chhat nahīñ sar par

mujh ko jab āsmāñ mayassar hai

sar pe saaya hai jin ke maaoñ kā

un ko jā-e-amāñ mayassar hai

aao chalte haiñ apne gaañv meñ

ab sabhī kuchh vahāñ mayassar hai

mil rahī hai ġharīb ko roTī

aur kapḌā makāñ mayassar hai

be-gharoñ kā vo dard kyā jaane

jis ko ik āshiyāñ mayassar hai

naaz ham ko bajā vatan par hai

ham ko sab kuchh yahāñ mayassar hai

aur kyā chāhiye hameñ 'aḳhtar'

mahfil-e-dostāñ mayassar hai

sar pe jo saeban mayassar hai

sab ko ye bhi kahan mayassar hai

kaise kah dun ki chhat nahin sar par

mujh ko jab aasman mayassar hai

sar pe saya hai jin ke maon ka

un ko ja-e-aman mayassar hai

aao chalte hain apne ganw mein

ab sabhi kuchh wahan mayassar hai

mil rahi hai gharib ko roTi

aur kapDa makan mayassar hai

be-gharon ka wo dard kya jaane

jis ko ek aashiyan mayassar hai

naz hum ko baja watan par hai

hum ko sab kuchh yahan mayassar hai

aur kya chahiye hamein 'aKHtar'

mahfil-e-dostan mayassar hai