sar Takraen jis se wo diwar kahan

sar Takrā.eñ jis se vo dīvār kahāñ

jism kahāñ aur ruuh kā ye āzār kahāñ

tanhā.ī kā kab ye aalam thā pahle

chhūT ga.e haiñ mujh se mere yaar kahāñ

andhe shahar ke sab ā.īne andhe haiñ

aise meñ ḳhud apnā bhī dīdār kahāñ

TuuTī TuuTī chand shabīheñ baaqī haiñ

dil meñ ab yādoñ kā vo ambār kahāñ

mere andar mujh se laḌtā hai koī

is paikār meñ jiit kahāñ aur haar kahāñ

ruuh do-nīm aur jism bhī hai reza reza

ḳhaak uḌātā phirtā hai pindār kahāñ

kyuuñ ye kashtī Dol rahī hai lahroñ par

TuuTā hai is kashtī kā patvār kahāñ

sar Takraen jis se wo diwar kahan

jism kahan aur ruh ka ye aazar kahan

tanhai ka kab ye aalam tha pahle

chhuT gae hain mujh se mere yar kahan

andhe shahar ke sab aaine andhe hain

aise mein KHud apna bhi didar kahan

TuTi TuTi chand shabihen baqi hain

dil mein ab yaadon ka wo ambar kahan

mere andar mujh se laDta hai koi

is paikar mein jit kahan aur haar kahan

ruh do-nim aur jism bhi hai reza reza

KHak uData phirta hai pindar kahan

kyun ye kashti Dol rahi hai lahron par

TuTa hai is kashti ka patwar kahan