sar uThae hue zindan se guzar jate hain

sar uThā.e hue zindāñ se guzar jaate haiñ

sar-phire log bayābāñ se guzar jaate haiñ

jānñe ke liye chaḌhte hue dariyā kā mizāj

ham to bahte hue tūfāñ se guzar jaate haiñ

yaad aa jaatā hai ham ko ġham-e-daurāñ kā sulūk

log jab bhī ġham-e-jānāñ se guzar jaate haiñ

ham ne dekhā hai masīhā ko bhī pāband-e-junūñ

ahl-e-dil jab kabhī darmāñ se guzar jaate haiñ

vo to aañsū the jo āñkhoñ hī meñ mahfūz rahe

ye haiñ kuchh phuul jo mizhgāñ se guzar jaate haiñ

fasl-e-gul laa.ī hai dāman meñ chhupā kar kāñTe

is liye phuul gulistāñ se guzar jaate haiñ

ik fasāna hai adhūrā sā na.e daur ke log

raushnī le ke shabistāñ se guzar jaate haiñ

sar uThā.e hue phirte the yahāñ kal jo 'munīr'

aaj vo gardish-e-daurāñ se guzar jaate haiñ

sar uThae hue zindan se guzar jate hain

sar-phire log bayaban se guzar jate hain

jaanne ke liye chaDhte hue dariya ka mizaj

hum to bahte hue tufan se guzar jate hain

yaad aa jata hai hum ko gham-e-dauran ka suluk

log jab bhi gham-e-jaanan se guzar jate hain

hum ne dekha hai masiha ko bhi paband-e-junun

ahl-e-dil jab kabhi darman se guzar jate hain

wo to aansu the jo aankhon hi mein mahfuz rahe

ye hain kuchh phul jo mizhgan se guzar jate hain

fasl-e-gul lai hai daman mein chhupa kar kanTe

is liye phul gulistan se guzar jate hain

ek fasana hai adhura sa nae daur ke log

raushni le ke shabistan se guzar jate hain

sar uThae hue phirte the yahan kal jo 'munir'

aaj wo gardish-e-dauran se guzar jate hain