sara-e-shar mein rahna paD raha hai

sarā-e-shar meñ rahnā paḌ rahā hai

qazā ke Dar meñ rahnā paḌ rahā hai

hai mere qatl ke darpai ḳhamoshī

sadā ke dar meñ rahnā paḌ rahā hai

maiñ ḳhud ko dūsroñ meñ dekhtā huuñ

so chashm-e-tar meñ rahnā paḌ rahā hai

ḳhayāl-o-ḳhvāb haiñ jis ke muāvin

use bistar meñ rahnā paḌ rahā hai

maiñ huuñ jis kā dil-o-jāñ se muḳhālif

usī lashkar meñ rahnā paḌ rahā hai

guzārā faqr par hotā hai phir bhī

panāh-e-zar meñ rahnā paḌ rahā hai

chalā hai hijratoñ kā daur jab se

zamāne-bhar meñ rahnā paḌ rahā hai

koī to laash hai mere havāle

jo murda ghar meñ rahnā paḌ rahā hai

havā ke paañv to bāhar haiñ 'rāhat'

mujhe chādar meñ rahnā paḌ rahā hai

sara-e-shar mein rahna paD raha hai

qaza ke Dar mein rahna paD raha hai

hai mere qatl ke darpai KHamoshi

sada ke dar mein rahna paD raha hai

main KHud ko dusron mein dekhta hun

so chashm-e-tar mein rahna paD raha hai

KHayal-o-KHwab hain jis ke muawin

use bistar mein rahna paD raha hai

main hun jis ka dil-o-jaan se muKHalif

usi lashkar mein rahna paD raha hai

guzara faqr par hota hai phir bhi

panah-e-zar mein rahna paD raha hai

chala hai hijraton ka daur jab se

zamane-bhar mein rahna paD raha hai

koi to lash hai mere hawale

jo murda ghar mein rahna paD raha hai

hawa ke panw to bahar hain 'rahat'

mujhe chadar mein rahna paD raha hai