sarab-e-dil se musalsal fareb kha raha hun

sarāb-e-dil se musalsal fareb khā rahā huuñ

maiñ ek umr se apne ḳhilāf jā rahā huuñ

yaqīn-o-shak kī ajab kaifiyat se huuñ do-chār

bichhā rahā huuñ musallā kabhī uThā rahā huuñ

mirā ġhurūr hai ye ḳhāk-zādgī merī

maiñ phir farishto tumheñ baat ye batā rahā huuñ

tilism-e-lafz-o-ma.ānī ke pher meñ phañs kar

ba-shakl-e-nazm-o-ġhazal ḳhūn-e-dil bahā rahā huuñ

ḳhiyām-e-ashk meñ jhulsī paḌī hai koī mushk

maiñ apnī pyaas kā qissa use sunā rahā huuñ

bhulā ke saare taqāze radīf-e-maut ke maiñ

faqat hayāt kā har qāfiya nibhā rahā huuñ

sarab-e-dil se musalsal fareb kha raha hun

main ek umr se apne KHilaf ja raha hun

yaqin-o-shak ki ajab kaifiyat se hun do-chaar

bichha raha hun musalla kabhi uTha raha hun

mera ghurur hai ye KHak-zadgi meri

main phir farishto tumhein baat ye bata raha hun

tilism-e-lafz-o-maani ke pher mein phans kar

ba-shakl-e-nazm-o-ghazal KHun-e-dil baha raha hun

KHiyam-e-ashk mein jhulsi paDi hai koi mushk

main apni pyas ka qissa use suna raha hun

bhula ke sare taqaze radif-e-maut ke main

faqat hayat ka har qafiya nibha raha hun