sarab hai ki nahin kyon janab hai ki nahin

sarāb hai ki nahīñ kyoñ janāb hai ki nahīñ

hamārī zindagī misl-e-habāb hai ki nahīñ

hamārī baat kā nāseh javāb hai ki nahīñ

gunāh-e-ishq pe koī azaab hai ki nahīñ

sabaq paḌheñge mohabbat kā tujh se par ye batā

tirī kitāb meñ sūkhā gulāb hai kī nahīñ

sabaq kyoñ amn kā ham hī paḌheñ kitāboñ meñ

tumhāre paas bhī koī kitāb hai ki nahīñ

milāvaToñ se hameñ hai gurez ai saaqī

hamāre vāste ḳhālis sharāb hai ki nahīñ

azāb-e-duniyā se mar kar to chhūT jā.eñge

jahāñ meñ jiinā musalsal azaab hai ki nahīñ

ai ishq tū ne mujhe jis tarah ḳharāb kiyā

mirī tarah se koī aur ḳharāb hai ki nahīñ

likhā hai bāb-e-mohabbat meñ phir bhī batlā tū

nigāh-e-yār se piinā savāb hai ki nahīñ

hadoñ se baḌhne lagī sar-kashī hasīnoñ kī

na.e zamāna meñ 'dānish' hijāb hai ki nahīñ

sarab hai ki nahin kyon janab hai ki nahin

hamari zindagi misl-e-habab hai ki nahin

hamari baat ka naseh jawab hai ki nahin

gunah-e-ishq pe koi azab hai ki nahin

sabaq paDhenge mohabbat ka tujh se par ye bata

teri kitab mein sukha gulab hai ki nahin

sabaq kyon amn ka hum hi paDhen kitabon mein

tumhaare pas bhi koi kitab hai ki nahin

milawaTon se hamein hai gurez ai saqi

hamare waste KHalis sharab hai ki nahin

azab-e-duniya se mar kar to chhuT jaenge

jahan mein jina musalsal azab hai ki nahin

ai ishq tu ne mujhe jis tarah KHarab kiya

meri tarah se koi aur KHarab hai ki nahin

likha hai bab-e-mohabbat mein phir bhi batla tu

nigah-e-yar se pina sawab hai ki nahin

hadon se baDhne lagi sar-kashi hasinon ki

nae zamana mein 'danish' hijab hai ki nahin