sarapa jism ko showroom kar ke

sarāpā jism ko showrōm kar ke

rakkheñge dard ko manzūm kar ke

na.ī ik dāstāñ marqūm kar ke

gayā vo zaḳhm ko mā'dūm kar ke

sukūñ paatā huuñ jitnā dekhtā huuñ

tirī tasvīr ko maiñ zoom kar ke

havā.eñ bāvlī sī ho ga.ī haiñ

tire ghar kā pata mā'lūm kar ke

na jaane kaunsā badlā liyā hai

mujhe dīdār se mahrūm kar ke

jise maiñ chāhtā huuñ haañ vo laḌkī

bahut ḳhush hai mujhe maġhmūm kar ke

agar jaañ chāhiye 'surḳhāb' le lo

magar lahja zarā mā'sūm kar ke

sarapa jism ko showroom kar ke

rakkhenge dard ko manzum kar ke

nai ek dastan marqum kar ke

gaya wo zaKHm ko ma'dum kar ke

sukun pata hun jitna dekhta hun

teri taswir ko main zoom kar ke

hawaen bawli si ho gai hain

tere ghar ka pata ma'lum kar ke

na jaane kaunsa badla liya hai

mujhe didar se mahrum kar ke

jise main chahta hun han wo laDki

bahut KHush hai mujhe maghmum kar ke

agar jaan chahiye 'surKHab' le lo

magar lahja zara ma'sum kar ke