sard aahon ne mere zaKHmon ko aabaad kiya

sard aahoñ ne mire zaḳhmoñ ko ābād kiyā

dil kī choToñ ne jo rah rah ke tujhe yaad kiyā

mehrbānī mire sayyād kī dekhe koī

jab ḳhizāñ aa.ī mujhe qaid se āzād kiyā

mahfil-e-nāz se laayā jo yahāñ tak un ko

tū ne ye kaam ajab ai dil-e-nāshād kiyā

mai-kashoñ ne use saaqī kā ishāra samjhā

jhuk ke shīshe ne jo sāġhar se kuchh irshād kiyā

dil-e-betāb ko mushkil se sambhālā thā magar

zabt-e-ġham ne mujhe āmāda-e-fariyād kiyā

kaam jab kuchh na banā ishq kī nākāmī se

dard ne aap ko sharminda-e-be-dād kiyā

ḳhud mujhe bhī nahīñ barbādī kā ehsās 'shajī.a'

is salīqe se kisī ne mujhe barbād kiyā

sard aahon ne mere zaKHmon ko aabaad kiya

dil ki choTon ne jo rah rah ke tujhe yaad kiya

mehrbani mere sayyaad ki dekhe koi

jab KHizan aai mujhe qaid se aazad kiya

mahfil-e-naz se laya jo yahan tak un ko

tu ne ye kaam ajab ai dil-e-nashad kiya

mai-kashon ne use saqi ka ishaara samjha

jhuk ke shishe ne jo saghar se kuchh irshad kiya

dil-e-betab ko mushkil se sambhaala tha magar

zabt-e-gham ne mujhe aamada-e-fariyaad kiya

kaam jab kuchh na bana ishq ki nakaami se

dard ne aap ko sharminda-e-be-dad kiya

KHud mujhe bhi nahin barbaadi ka ehsas 'shajia'

is saliqe se kisi ne mujhe barbaad kiya