sard mausam ka sar-e-sham taqaza kya hai

sard mausam kā sar-e-shām taqāzā kyā hai

phir kisī harf-e-mukarrar ne pukārā kyā hai

ye bhī ik umr-e-ravāñ kī hai hikāyat shāyad

chaḌhte sūraj kā Dhalī shaam se rishta kyā hai

ek sad-barg se manzar kī hunar-kārī sā

shahr meñ aaj tire ishq kā charchā kyā hai

phir dabe paañv guzar hī ga.ī raunaq dil kī

nukta-dāñ aaj mire ġham kā mudāvā kyā hai

tum nahīñ soch meñ ġharqāb na sahī ye to batāo

aañkh par ek sitāra sā chamaktā kyā hai

gumrahī hī ne na.ī raah batā.ī ab tak

dekh ujāloñ meñ chamaktā sā añdherā kyā hai

ik masāfat kī thakan hī meñ musallam goyā

phir kabhī duur kī manzil ne pukārā kyā hai

dard phir aaj ḳhirāmāñ hai na.ī saj-dhaj se

dil meñ maazī kā ye khultā sā darīcha kyā hai

phir kisī harf-e-hidāyat kī tarah bojhal sā

simTe simTe se savāboñ kā ye samra kyā hai

sard mausam ka sar-e-sham taqaza kya hai

phir kisi harf-e-mukarrar ne pukara kya hai

ye bhi ek umr-e-rawan ki hai hikayat shayad

chaDhte suraj ka Dhali sham se rishta kya hai

ek sad-barg se manzar ki hunar-kari sa

shahr mein aaj tere ishq ka charcha kya hai

phir dabe panw guzar hi gai raunaq dil ki

nukta-dan aaj mere gham ka mudawa kya hai

tum nahin soch mein gharqab na sahi ye to batao

aankh par ek sitara sa chamakta kya hai

gumrahi hi ne nai rah batai ab tak

dekh ujalon mein chamakta sa andhera kya hai

ek masafat ki thakan hi mein musallam goya

phir kabhi dur ki manzil ne pukara kya hai

dard phir aaj KHiraman hai nai saj-dhaj se

dil mein mazi ka ye khulta sa daricha kya hai

phir kisi harf-e-hidayat ki tarah bojhal sa

simTe simTe se sawabon ka ye samra kya hai