sarhad-e-kaun-o-makan se la-makan le jaega

sarhad-e-kaun-o-makāñ se lā-makāñ le jā.egā

jab zamīñ chhoḌegī ham ko āsmāñ le jā.egā

raat se qaa.em haiñ un ke saa.e kī ḳhush-fahmiyāñ

jab chaḌhā sūraj to saare sā.ebāñ le jā.egā

ham hisār-e-zāt se nikle to haiñ par dekhiye

TuuT kar ḳhud se bikharnā ab kahāñ le jā.egā

ḳhāmushī hī ḳhāmushī ke karb kā iz.hār ho

lafz ḳhāmoshī se lutf-e-dāstāñ le jā.egā

dil kī ḳhushbū se hai zinda un ke rangoñ kī dhanak

vaqt saarī ḳhvāhishoñ kī titliyāñ le jā.egā

sarhad-e-kaun-o-makan se la-makan le jaega

jab zamin chhoDegi hum ko aasman le jaega

raat se qaem hain un ke sae ki KHush-fahmiyan

jab chaDha suraj to sare saeban le jaega

hum hisar-e-zat se nikle to hain par dekhiye

TuT kar KHud se bikharna ab kahan le jaega

KHamushi hi KHamushi ke karb ka izhaar ho

lafz KHamoshi se lutf-e-dastan le jaega

dil ki KHushbu se hai zinda un ke rangon ki dhanak

waqt sari KHwahishon ki titliyan le jaega