sarishk-e-KHun sar-e-mizhgan kabhi piroe na the

sarishk-e-ḳhūñ sar-e-mizhgāñ kabhī piro.e na the

ham itnā hañsne ke ba.ad is tarah se ro.e na the

sitam ye hai ki vo ḳhurshīd kāTne aa.e

tamām umr sitāre jinhoñ ne bo.e na the

ab aap apnī tamannāoñ se huuñ sharminda

ye daaġh vo haiñ jo maiñ ne lahū se dho.e na the

bahe vo ashk ki ġharqāb ho ga.iiñ āñkheñ

safīne is tarah ham ne kabhī Dubo.e na the

charāġh laao koī āftāb hī DhūñDeñ

ham is qadar kabhī tārīkiyoñ meñ kho.e na the

ik āh-e-sard ke ba.ad āñkheñ muuñd liiñ 'mohsin'

ye kyā huā kabhī ThanDī havā meñ so.e na the

sarishk-e-KHun sar-e-mizhgan kabhi piroe na the

hum itna hansne ke baad is tarah se roe na the

sitam ye hai ki wo KHurshid kaTne aae

tamam umr sitare jinhon ne boe na the

ab aap apni tamannaon se hun sharminda

ye dagh wo hain jo main ne lahu se dhoe na the

bahe wo ashk ki gharqab ho gain aankhen

safine is tarah hum ne kabhi Duboe na the

charagh lao koi aaftab hi DhunDen

hum is qadar kabhi tarikiyon mein khoe na the

ek aah-e-sard ke baad aankhen mund lin 'mohsin'

ye kya hua kabhi ThanDi hawa mein soe na the