sarmaya-e-azmat hai bulandi ka nishan hai

sarmāya-e-'azmat hai bulandī kā nishāñ hai

har 'azm mirā apnī jagah koh-e-girāñ hai

vahshat mire is shahr meñ yuuñ raqs-kunāñ hai

har kūcha-o-bāzār pe sahrā kā gumāñ hai

ik qissa-e-pārīna huā ‘ahd-e-ġhulāmī

insāñ kī ġhulāmī kā vo ab 'ahd kahāñ hai

insān ko insān kā haq denā hī hogā

ye vaqt kā manshā hai taqāzā-e-jahāñ hai

ik sub.h-e-daraḳhshāñ kā tasavvur jo abhī tak

ehsās kī mānind mire dil meñ javāñ hai

manzil kā ta’ayyun nahīñ mumkin ki mirā zehn

nādīda bahāroñ ke ta'āqub meñ ravāñ hai

jis shaḳhs ne tārīḳh ko 'unvān diye the

vo shaḳhs tire shahr meñ benām-o-nishāñ hai

nā-qadr-shanāsī hai muqaddar tirā fankār

ye mātam-e-fan marsiya-e-kam-nazarāñ hai

chehre pe likhī hai mire hālāt kī tasvīr

paḌh lo mirā chehra ki har ik baat 'ayāñ hai

'bāsit' tujhe manzil to bahar-hāl milegī

kuchh ġham nahīñ jo raah meñ ġhauġhā-e-sagāñ hai

sarmaya-e-'azmat hai bulandi ka nishan hai

har 'azm mera apni jagah koh-e-giran hai

wahshat mere is shahr mein yun raqs-kunan hai

har kucha-o-bazar pe sahra ka guman hai

ek qissa-e-parina hua ‘ahd-e-ghulami

insan ki ghulami ka wo ab 'ahd kahan hai

insan ko insan ka haq dena hi hoga

ye waqt ka mansha hai taqaza-e-jahan hai

ek subh-e-daraKHshan ka tasawwur jo abhi tak

ehsas ki manind mere dil mein jawan hai

manzil ka ta’ayyun nahin mumkin ki mera zehn

nadida bahaaron ke ta'aqub mein rawan hai

jis shaKHs ne tariKH ko 'unwan diye the

wo shaKHs tere shahr mein benam-o-nishan hai

na-qadr-shanasi hai muqaddar tera fankar

ye matam-e-fan marsiya-e-kam-nazaran hai

chehre pe likhi hai mere haalat ki taswir

paDh lo mera chehra ki har ek baat 'ayan hai

'basit' tujhe manzil to bahar-haal milegi

kuchh gham nahin jo rah mein ghaugha-e-sagan hai