sarmaya-e-nashat-e-tamanna liye hue

sarmāya-e-nashāt-e-tamanna liye hue

baiThā huuñ dil meñ dard kī duniyā liye hue

dil ko malāl-e-hasrat-e-dīdār hī rahā

sad.hā nuqūsh-e-chehra-e-zebā liye hue

māyūsiyoñ meñ Duub gayā dil hazār-haif

ik kaif-e-musta.ār-e-tamanna liye hue

achchhī nibhī kisī se rah-o-rasm-e-dostī

sad-hīla-hā.e ranjish-e-bejā liye hue

āñkhoñ meñ ḳhūn-e-hasrat-e-dīdār-e-yār hai

rang-e-jamāl chehra-e-zebā liye hue

tai ho gayā hai marhala-e-qurb-o-infisāl

nāzuk sā ek va.ada-e-fardā liye hue

hai aaj bhī laboñ pe vahī iltijā-e-ḳhās

muhr-e-sukūt-e-husn-e-taqāzā liye hue

hirmān-o-yās-o-hasrat-o-nākāmī-e-mudām

ye ek jān-e-zār hai kyā kyā liye hue

'ahmar' kise ḳhabar thī ki uTh ā.eñge yūñhī

mahfil se un kī un kī tamanna liye hue

sarmaya-e-nashat-e-tamanna liye hue

baiTha hun dil mein dard ki duniya liye hue

dil ko malal-e-hasrat-e-didar hi raha

sadha nuqush-e-chehra-e-zeba liye hue

mayusiyon mein Dub gaya dil hazar-haif

ek kaif-e-mustaar-e-tamanna liye hue

achchhi nibhi kisi se rah-o-rasm-e-dosti

sad-hila-hae ranjish-e-beja liye hue

aankhon mein KHun-e-hasrat-e-didar-e-yar hai

rang-e-jamal chehra-e-zeba liye hue

tai ho gaya hai marhala-e-qurb-o-infisal

nazuk sa ek wada-e-farda liye hue

hai aaj bhi labon pe wahi iltija-e-KHas

muhr-e-sukut-e-husn-e-taqaza liye hue

hirman-o-yas-o-hasrat-o-nakaami-e-mudam

ye ek jaan-e-zar hai kya kya liye hue

'ahmar' kise KHabar thi ki uTh aaenge yunhi

mahfil se un ki un ki tamanna liye hue