sarsabz mausamon ka asar le gaya koi

sarsabz mausamoñ kā asar le gayā koī

thoḌī sī chhāñv de ke shajar le gayā koī

merā difā.a merā hunar le gayā koī

dastār jab bachā.ī to sar le gayā koī

kyā kyā na shauq-e-dīd the āñkhoñ meñ ḳhema-zan

vo rū-ba-rū hue to nazar le gayā koī

yuuñ bhī huā hai jashn-e-bahārāñ ke naam par

shāḳheñ tarāsh Dālīñ shajar le gayā koī

āñkhoñ ke ār-pār jahālat kī dhuup hai

sar se ridā-e-ilm-o-hunar le gayā koī

lahroñ meñ iztirāb na maujoñ meñ pech-o-tāb

dariyā-e-dil se mere bhañvar le gayā koī

'aḳhtar' nigār-ḳhāna-e-dil dīdanī hai ab

dīvāreñ toḌ dī ga.iiñ dar le gayā koī

sarsabz mausamon ka asar le gaya koi

thoDi si chhanw de ke shajar le gaya koi

mera difaa mera hunar le gaya koi

dastar jab bachai to sar le gaya koi

kya kya na shauq-e-did the aankhon mein KHema-zan

wo ru-ba-ru hue to nazar le gaya koi

yun bhi hua hai jashn-e-bahaaran ke nam par

shaKHen tarash Dalin shajar le gaya koi

aankhon ke aar-par jahaalat ki dhup hai

sar se rida-e-ilm-o-hunar le gaya koi

lahron mein iztirab na maujon mein pech-o-tab

dariya-e-dil se mere bhanwar le gaya koi

'aKHtar' nigar-KHana-e-dil didani hai ab

diwaren toD di gain dar le gaya koi