sarson ke kheton mein apne kaghaz dhani karte karte

sarsoñ ke khetoñ meñ apne kāġhaz dhānī karte karte

ġhazleñ saarī likkhī ham ne ḳhuuñ ko paanī karte karte

majbūrī ke chāval bhūne lāchārī do muTThī Daalī

ham ne khāyā ġham ko apne phir guḌ-dhānī karte karte

is duniyā meñ jo bhī bhāyā us ko ham ne ḳhud sā samjhā

ik arsa biitā hai ham ko ye nādānī karte karte

kyoñ dariyā bhar misra-e-ūlā us kī mayyat par thā royā

jis shā.ir kā dam niklā thā misra-e-sānī karte karte

pahle un se duurī rakkhī phir ḳhud hī thā iz.hār kiyā

aise dil ne chāhā un ko ānā-kānī karte karte

sab ke man kī karte karte jaane biitī kitnī sadiyāñ

ham ko to jiinā thā yaaro bas man-mānī karte karte

ġham ke mausam meñ kyoñ kar lī ham ne in ġhazloñ se yaarī

ab to saarī umr kaTegī ashk-bayānī karte karte

sarson ke kheton mein apne kaghaz dhani karte karte

ghazlen sari likkhi hum ne KHun ko pani karte karte

majburi ke chawal bhune lachaari do muTThi Dali

hum ne khaya gham ko apne phir guD-dhani karte karte

is duniya mein jo bhi bhaya us ko hum ne KHud sa samjha

ek arsa bita hai hum ko ye nadani karte karte

kyon dariya bhar misra-e-ula us ki mayyat par tha roya

jis shair ka dam nikla tha misra-e-sani karte karte

pahle un se duri rakkhi phir KHud hi tha izhaar kiya

aise dil ne chaha un ko aana-kani karte karte

sab ke man ki karte karte jaane biti kitni sadiyan

hum ko to jina tha yaro bas man-mani karte karte

gham ke mausam mein kyon kar li hum ne in ghazlon se yari

ab to sari umr kaTegi ashk-bayani karte karte