sata rahi hai bahut machhliyon ki bas mujhe

satā rahī hai bahut machhliyoñ kī baas mujhe

bulā rahā hai samundar phir apne paas mujhe

havas kā shīsha-e-nāzuk huuñ phuuT jā.ūñgā

na maar khīñch ke is tarah sañg-e-yās mujhe

maiñ qaid meñ kabhī dīvār-o-dar kī rah na sakā

na aa sakā kabhī shahroñ kā rañg raas mujhe

maiñ tere jism ke dariyā ko pī chukā huuñ bahut

satā rahī hai phir ab kyuuñ badan kī pyaas mujhe

mire badan meñ chhupā hai samundaroñ kā fusūñ

jalā sakegī bhalā kyā ye ḳhushk ghaas mujhe

giregā TuuT ke sar par ye āsmān kabhī

Darā.e rakhtā hai har dam mirā qayās mujhe

jhulas rahā huuñ maiñ sadiyoñ se ġham ke sahrā meñ

magar hai abr-e-gurezāñ kī phir bhī aas mujhe

sata rahi hai bahut machhliyon ki bas mujhe

bula raha hai samundar phir apne pas mujhe

hawas ka shisha-e-nazuk hun phuT jaunga

na mar khinch ke is tarah sang-e-yas mujhe

main qaid mein kabhi diwar-o-dar ki rah na saka

na aa saka kabhi shahron ka rang ras mujhe

main tere jism ke dariya ko pi chuka hun bahut

sata rahi hai phir ab kyun badan ki pyas mujhe

mere badan mein chhupa hai samundaron ka fusun

jala sakegi bhala kya ye KHushk ghas mujhe

girega TuT ke sar par ye aasman kabhi

Darae rakhta hai har dam mera qayas mujhe

jhulas raha hun main sadiyon se gham ke sahra mein

magar hai abr-e-gurezan ki phir bhi aas mujhe