sath-biin the sab, rahe bahar ki kai dekhte

sat.h-bīiñ the sab, rahe bāhar kī kaa.ī dekhte

log kaise mere andar kī safā.ī dekhte

us se milne kā nishāñ tak bhī nazar aatā nahīñ

ek muddat ho ga.ī rāh-e-judā.ī dekhte

ham to apnī vus.at-e-dil se bhī kosoñ duur the

tere dil tak kis tarah apnī rasā.ī dekhte

aap hī thak-hār kar apne ko behis kar liyā

zindagī kab tak tirī be-e'tinā.ī dekhte

yuuñ na kho jaate fazā-e-yās meñ duniyā ke saath

kaash apnā hī lab-o-lahja rajā.ī dekhte

dil kī majbūrī se baḌh kar koī majbūrī na thī

ham bhī kuchh karte agar ḳhud se rihā.ī dekhte

kaash dhartī par girā ḳhuuñ rañg le aatā 'riyāz'

jīte-jī ham apnī fasloñ kī kaTā.ī dekhte

sath-biin the sab, rahe bahar ki kai dekhte

log kaise mere andar ki safai dekhte

us se milne ka nishan tak bhi nazar aata nahin

ek muddat ho gai rah-e-judai dekhte

hum to apni wusat-e-dil se bhi koson dur the

tere dil tak kis tarah apni rasai dekhte

aap hi thak-haar kar apne ko behis kar liya

zindagi kab tak teri be-e'tinai dekhte

yun na kho jate faza-e-yas mein duniya ke sath

kash apna hi lab-o-lahja rajai dekhte

dil ki majburi se baDh kar koi majburi na thi

hum bhi kuchh karte agar KHud se rihai dekhte

kash dharti par gira KHun rang le aata 'riyaz'

jite-ji hum apni faslon ki kaTai dekhte