sau bar us se laD ke bhi har bar haarna

sau baar us se laḌ ke bhī har baar hārnā

baazī ho ishq kī to mire yaar hārnā

us se shikast khāne meñ har baar lutf hai

ik baar hārnā ho ke sau baar hārnā

vo dil pe haath rakh de agar pyaar se kabhī

dil kā yahī taqāzā hai dildār hārnā

duniyā meñ raushnī hai vafāoñ ke nuur se

ban kar kisī ke tum bhī talabgār hārnā

jin kī duāoñ se tirī hastī kamāl hai

māñ-bāp ke liye to ye sansār hārnā

hai lutf zindagī kā mohabbat kī qaid meñ

pahlū meñ un ke ho ke giraftār hārnā

rakhnā bulandiyoñ pe hamesha vaqār ko

tum jaan hārnā nahīñ dastār hārnā

aisā bhī vaqt aaya hai ahd-e-shabāb meñ

ik phuul ke liye koī gulzār hārnā

ilm-o-adab meñ ham ne ye sīkhā hai 'sāhiba'

rakh kar qalam ke sāmne talvār hārnā

sau bar us se laD ke bhi har bar haarna

bazi ho ishq ki to mere yar haarna

us se shikast khane mein har bar lutf hai

ek bar haarna ho ke sau bar haarna

wo dil pe hath rakh de agar pyar se kabhi

dil ka yahi taqaza hai dildar haarna

duniya mein raushni hai wafaon ke nur se

ban kar kisi ke tum bhi talabgar haarna

jin ki duaon se teri hasti kamal hai

man-bap ke liye to ye sansar haarna

hai lutf zindagi ka mohabbat ki qaid mein

pahlu mein un ke ho ke giraftar haarna

rakhna bulandiyon pe hamesha waqar ko

tum jaan haarna nahin dastar haarna

aisa bhi waqt aaya hai ahd-e-shabab mein

ek phul ke liye koi gulzar haarna

ilm-o-adab mein hum ne ye sikha hai 'sahiba'

rakh kar qalam ke samne talwar haarna