sau jahan aur bhi hain wusat-e-aflak mein gum

sau jahāñ aur bhī haiñ vus'at-e-aflāk meñ gum

aur tū rahtā hai har vaqt yahāñ ḳhaak meñ gum

Duube rahte haiñ tirī yaad meñ ham bhī aise

kūza-gar jaise hama-vaqt rahe chaak meñ gum

uThne vaalā hai zamīñ se kisī mahshar kā ġhubār

hone vaale haiñ sitāre ḳhas-o-ḳhāshāk meñ gum

us ko dekhūñgā miyāñ jab hī thamegā tūfān

hai abhī chāñd mire dīda-e-namnāk meñ gum

raqs karte hue darvesh ko mā'lūm hai sab

kitne advār haiñ uḌtī huī is ḳhaak meñ gum

mas.ale ziist ko darpesh zamīñ par haiñ 'asar'

ham hue jaate haiñ is hairat-e-aflāk meñ gum

sau jahan aur bhi hain wus'at-e-aflak mein gum

aur tu rahta hai har waqt yahan KHak mein gum

Dube rahte hain teri yaad mein hum bhi aise

kuza-gar jaise hama-waqt rahe chaak mein gum

uThne wala hai zamin se kisi mahshar ka ghubar

hone wale hain sitare KHas-o-KHashak mein gum

us ko dekhunga miyan jab hi thamega tufan

hai abhi chand mere dida-e-namnak mein gum

raqs karte hue darwesh ko ma'lum hai sab

kitne adwar hain uDti hui is KHak mein gum

masale zist ko darpesh zamin par hain 'asar'

hum hue jate hain is hairat-e-aflak mein gum