sawad-e-sham-e-safar ka malal kuchh bhi nahin

savād-e-shām-e-safar kā malāl kuchh bhī nahīñ

karūñ maiñ arz bhī kyā arz-e-hāl kuchh bhī nahīñ

dil-e-hazīñ kā bayāñ laakh kījiye bhī to kyā

agarche us ko hamārā ḳhayāl kuchh bhī nahīñ

balā kī aarzū paale hue hai dil ye hanūz

is aarzū ke liye māh-o-sāl kuchh bhī nahīñ

nishān-e-ḳhalvat-e-shab dil pe naqsh hai lekin

fareb-e-ishq kā ham ko malāl kuchh bhī nahīñ

ḳhamoshiyāñ bhī bahut kuchh bayān kartī haiñ

bayān-e-ishq ko lafz-o-ḳhayāl kuchh bhī nahīñ

suneñge aap bhī ik din dil-e-shikasta se

uruuj kuchh bhī nahīñ hai zavāl kuchh bhī nahīñ

savāl zehn meñ yuuñ to hazāroñ haiñ 'ārif'

magar ye kyā hai ki us se savāl kuchh bhī nahīñ

sawad-e-sham-e-safar ka malal kuchh bhi nahin

karun main arz bhi kya arz-e-haal kuchh bhi nahin

dil-e-hazin ka bayan lakh kijiye bhi to kya

agarche us ko hamara KHayal kuchh bhi nahin

bala ki aarzu pale hue hai dil ye hanuz

is aarzu ke liye mah-o-sal kuchh bhi nahin

nishan-e-KHalwat-e-shab dil pe naqsh hai lekin

fareb-e-ishq ka hum ko malal kuchh bhi nahin

KHamoshiyan bhi bahut kuchh bayan karti hain

bayan-e-ishq ko lafz-o-KHayal kuchh bhi nahin

sunenge aap bhi ek din dil-e-shikasta se

uruj kuchh bhi nahin hai zawal kuchh bhi nahin

sawal zehn mein yun to hazaron hain 'arif'

magar ye kya hai ki us se sawal kuchh bhi nahin