sawal-e-wasl pe wo but nufur humse hua

savāl-e-vasl pe vo but nufūr ham se huā

baḌā gunāh dil-e-nā-subūr ham se huā

jo kuchh huā na thā rabb-e-ġhafūr ham se huā

kiye gunāh bahut kam qusūr ham se huā

firāq-e-yār meñ haañ haañ zarūr ham se huā

zarūr sabr dil-e-nā-subūr ham se huā

jafā ke shikve pe un kī vo nīchī nīchī nazar

vo haath bāñdh ke kahnā qusūr ham se huā

umiid kahte haiñ kis ko yaqīn hai zāhid

ga.e bahisht meñ ham ishq-e-hūr ham se huā

khiñchā ba-sūrat-e-ḳhanjar banā rag-e-gardan

vo jitnā paas rahā utnī duur ham se huā

gunāhgār na hote to afv kyā hotā

ilāhī tere karam kā zuhūr ham se huā

tumhāre gāloñ pe kis din thā chaar chullū ḳhuuñ

shahīd vo haiñ ki chehre pe nuur ham se huā

ye kah rahe haiñ kisī kī nashīlī aañkh ke tiir

ki chashm-e-zaḳhm-e-jigar meñ surūr ham se huā

kahe to jā.iye tark-e-butāñ kī ai vaa.iz

huzūr ham se ye hogā huzūr ham se huā

hamīñ to toḌte haiñ jaam mohtasib sach hai

kisī kā shīsha-e-dil chūr-chūr ham se huā

ḳhatā muaaf ye jī meñ hai le ke bosa-e-zulf

tumhīñ se arz kareñge qusūr ham se huā

hayā meñ shoḳhī sikhā.ī tumheñ karam meñ sitam

nigah meñ naaz adā meñ ġhurūr ham se huā

sharāb pī hai ba-yād-e-ruḳh-e-malīh-e-butāñ

ye aab rashk-e-sharāb-e-tahūr ham se huā

salīqa ham ne batāyā sitamgarī kā tumheñ

tamīz ham ne sikhā.ī shu.ūr ham se huā

nikāl laa.e butoñ ko hazār pardoñ se

jahāñ meñ aam tamāshā-e-tūr ham se huā

kamāl ye hai ki insāñ bane vo but 'rāsiḳh'

ye maanā rashk-e-parī rashk-e-hūr ham se huā

sawal-e-wasl pe wo but nufur hum se hua

baDa gunah dil-e-na-subur hum se hua

jo kuchh hua na tha rabb-e-ghafur hum se hua

kiye gunah bahut kam qusur hum se hua

firaq-e-yar mein han han zarur hum se hua

zarur sabr dil-e-na-subur hum se hua

jafa ke shikwe pe un ki wo nichi nichi nazar

wo hath bandh ke kahna qusur hum se hua

umid kahte hain kis ko yaqin hai zahid

gae bahisht mein hum ishq-e-hur hum se hua

khincha ba-surat-e-KHanjar bana rag-e-gardan

wo jitna pas raha utni dur hum se hua

gunahgar na hote to afw kya hota

ilahi tere karam ka zuhur hum se hua

tumhaare galon pe kis din tha chaar chullu KHun

shahid wo hain ki chehre pe nur hum se hua

ye kah rahe hain kisi ki nashili aankh ke tir

ki chashm-e-zaKHm-e-jigar mein surur hum se hua

kahe to jaiye tark-e-butan ki ai waiz

huzur hum se ye hoga huzur hum se hua

hamin to toDte hain jam mohtasib sach hai

kisi ka shisha-e-dil chur-chur hum se hua

KHata muaf ye ji mein hai le ke bosa-e-zulf

tumhin se arz karenge qusur hum se hua

haya mein shoKHi sikhai tumhein karam mein sitam

nigah mein naz ada mein ghurur hum se hua

sharab pi hai ba-yaad-e-ruKH-e-malih-e-butan

ye aab rashk-e-sharab-e-tahur hum se hua

saliqa hum ne bataya sitamgari ka tumhein

tamiz hum ne sikhai shuur hum se hua

nikal lae buton ko hazar pardon se

jahan mein aam tamasha-e-tur hum se hua

kamal ye hai ki insan bane wo but 'rasiKH'

ye mana rashk-e-pari rashk-e-hur hum se hua