sawal us se hamara kahan nibah ka hai

savāl us se hamārā kahāñ nibāh kā hai

mutāliba hai magar sirf ik nigāh kā hai

hameshgī ke marāsim to dil ko raas nahīñ

ilaaj is kā vahī rabt gaah gaah kā hai

maiñ dīn-e-ishq meñ tauhīd kā jo qaa.il huuñ

to mo.ajaza ye tire husn-e-be-panāh kā hai

visāl-o-hijr se maiñ kis kā intiḳhāb karūñ

yahāñ pe ḳhud se mujhe ḳhauf ishtibāh kā hai

ḳhabar nahīñ hai abhī us kī kam-nigāhī ko

ki ek marhala ḳhud ye bhī rasm-o-rāh kā hai

mo.arriḳhoñ ko kisī aur par na shak guzre

ki mujh ko mārne vaalā mirī sipāh kā hai

sawal us se hamara kahan nibah ka hai

mutaliba hai magar sirf ek nigah ka hai

hameshgi ke marasim to dil ko ras nahin

ilaj is ka wahi rabt gah gah ka hai

main din-e-ishq mein tauhid ka jo qail hun

to moajaza ye tere husn-e-be-panah ka hai

visal-o-hijr se main kis ka intiKHab karun

yahan pe KHud se mujhe KHauf ishtibah ka hai

KHabar nahin hai abhi us ki kam-nigahi ko

ki ek marhala KHud ye bhi rasm-o-rah ka hai

moarriKHon ko kisi aur par na shak guzre

ki mujh ko marne wala meri sipah ka hai