sawal ye hai kisi ki koi KHata bhi nahin

savāl ye hai kisī kī koī ḳhatā bhī nahīñ

charāġh kaise bujhā jab yahāñ havā bhī nahīñ

na jaane kaun use tūfāñ se paar kartā hai

mire safīne meñ tasvīr-e-nā-ḳhudā bhī nahīñ

tamām vaqt unheñ dekhne meñ biit gayā

jo baat kahne ga.e the use kahā bhī nahīñ

davā to ḳhair mirī muflisī kī nazr huī

lab-e-masīhā pe mere liye du'ā bhī nahīñ

jo maiñ matā’-e-ḳhudī se ḳharīd luuñ us ko

vo be-bahā hai magar itnā be-bahā bhī nahīñ

usī ko fāteh-e-manzil kā mil gayā e'zāz

jo sang-e-mīl kī sūrat kabhī chalā bhī nahīñ

vo mere zikr pe ye kah ke ho ga.e ḳhāmosh

bhalā nahīñ hai agar 'hosh' to burā bhī nahīñ

sawal ye hai kisi ki koi KHata bhi nahin

charagh kaise bujha jab yahan hawa bhi nahin

na jaane kaun use tufan se par karta hai

mere safine mein taswir-e-na-KHuda bhi nahin

tamam waqt unhen dekhne mein bit gaya

jo baat kahne gae the use kaha bhi nahin

dawa to KHair meri muflisi ki nazr hui

lab-e-masiha pe mere liye du'a bhi nahin

jo main mata’-e-KHudi se KHarid lun us ko

wo be-baha hai magar itna be-baha bhi nahin

usi ko fateh-e-manzil ka mil gaya e'zaz

jo sang-e-mil ki surat kabhi chala bhi nahin

wo mere zikr pe ye kah ke ho gae KHamosh

bhala nahin hai agar 'hosh' to bura bhi nahin