sawere mein bhi haalat sham ki hai

savere meñ bhī hālat shaam kī hai

ye kaisī sub.h kaisī raushnī hai

havā ke qāfile so.e hue haiñ

ghane jangal meñ phailī ḳhāmushī hai

liye hāthoñ meñ tanhā.ī kā parcham

udāsī siskiyoñ se laḌ rahī hai

simaTnā ab nazar aatā hai mushkil

bahut bikhrī hamārī zindagī hai

nazar ke sāmne manzil hai lekin

masāfat phir bhī baḌhtī jā rahī hai

bahut hairat se takte haiñ sitāre

nadī jab sāhiloñ se kheltī hai

baras kar jā chukā hai abr-pāra

zamīñ se kaisī ḳhushbū aa rahī hai

talāsh-e-barg-e-gul hai us ko shāyad

jo titlī pañkh khole uḌ rahī hai

zamīñ oḌhe hue hai sar pe āñchal

ye jo qaus-e-quzah bikhrī huī hai

guzartā vaqt jo chāhe vo likkhe

kitāb-e-zindagī saada paḌī hai

yaqīnan aa gayā hai vaqt-e-āḳhir

diye kī lau jo itnī baḌh ga.ī hai

kisī tūfān kā hai pesh-ḳhema

samundar meñ jo itnī ḳhāmushī hai

agar ghar meñ nahīñ hai 'nūr' koī

to ye āvāz kaisī aa rahī hai

sawere mein bhi haalat sham ki hai

ye kaisi subh kaisi raushni hai

hawa ke qafile soe hue hain

ghane jangal mein phaili KHamushi hai

liye hathon mein tanhai ka parcham

udasi siskiyon se laD rahi hai

simaTna ab nazar aata hai mushkil

bahut bikhri hamari zindagi hai

nazar ke samne manzil hai lekin

masafat phir bhi baDhti ja rahi hai

bahut hairat se takte hain sitare

nadi jab sahilon se khelti hai

baras kar ja chuka hai abr-para

zamin se kaisi KHushbu aa rahi hai

talash-e-barg-e-gul hai us ko shayad

jo titli pankh khole uD rahi hai

zamin oDhe hue hai sar pe aanchal

ye jo qaus-e-quzah bikhri hui hai

guzarta waqt jo chahe wo likkhe

kitab-e-zindagi sada paDi hai

yaqinan aa gaya hai waqt-e-aKHir

diye ki lau jo itni baDh gai hai

kisi tufan ka hai pesh-KHema

samundar mein jo itni KHamushi hai

agar ghar mein nahin hai 'nur' koi

to ye aawaz kaisi aa rahi hai