shaeri kawish-e-paiham ke siwa kuchh bhi nahin

shā.erī kāvish-e-paiham ke sivā kuchh bhī nahīñ

aur is kāvish-e-paiham kā sila kuchh bhī nahīñ

zar-parastoñ ko to ab ḳhauf-e-ḳhudā kuchh bhī nahīñ

pās-e-dīñ pās-e-adab pās-e-vafā kuchh bhī nahīñ

roz-o-shab ātish-e-jazbāt meñ jalte rahnā

āshiqī soz-e-musalsal ke sivā kuchh bhī nahīñ

kaun ye ruuh ko āvāz diye jaatā hai

hama-tan-gosh huuñ maiñ aur sadā kuchh bhī nahīñ

aap bhī hoñ mire hamrāh to kuchh baat bane

varna in chāñdnī rātoñ kā mazā kuchh bhī nahīñ

zindagī hī meñ gunāhoñ kī sazā miltī hai

hashr kuchh chiiz nahīñ roz-e-jazā kuchh bhī nahīñ

daur-e-hāzir kī sharī.at meñ ravā hai sab kuchh

nāravā kuchh bhī nahīñ aur burā kuchh bhī nahīñ

kyā kahā vaqt-e-musībat koī kaam aa.egā

aap ko fitrat-e-insāñ kā patā kuchh bhī nahīñ

āzmāyā hai bahut apnoñ ko begānoñ ko

mujh ko ab ahl-e-zamāna se gilā kuchh bhī nahīñ

ġham milā ranj milā tum ko mohabbat meñ 'bahār'

phir bhī kahte ho mohabbat meñ dharā kuchh bhī nahīñ

shaeri kawish-e-paiham ke siwa kuchh bhi nahin

aur is kawish-e-paiham ka sila kuchh bhi nahin

zar-paraston ko to ab KHauf-e-KHuda kuchh bhi nahin

pas-e-din pas-e-adab pas-e-wafa kuchh bhi nahin

roz-o-shab aatish-e-jazbaat mein jalte rahna

aashiqi soz-e-musalsal ke siwa kuchh bhi nahin

kaun ye ruh ko aawaz diye jata hai

hama-tan-gosh hun main aur sada kuchh bhi nahin

aap bhi hon mere hamrah to kuchh baat bane

warna in chandni raaton ka maza kuchh bhi nahin

zindagi hi mein gunahon ki saza milti hai

hashr kuchh chiz nahin roz-e-jaza kuchh bhi nahin

daur-e-hazir ki shariat mein rawa hai sab kuchh

narawa kuchh bhi nahin aur bura kuchh bhi nahin

kya kaha waqt-e-musibat koi kaam aaega

aap ko fitrat-e-insan ka pata kuchh bhi nahin

aazmaya hai bahut apnon ko beganon ko

mujh ko ab ahl-e-zamana se gila kuchh bhi nahin

gham mila ranj mila tum ko mohabbat mein 'bahaar'

phir bhi kahte ho mohabbat mein dhara kuchh bhi nahin