shairi ibarat hai dagh ke gharane se

shā.irī ibārat hai 'dāġh' ke gharāne se

luT rahī hai ye daulat us bhare ḳhazāne se

ġham nahīñ zarā mujh ko ġharq-e-bahr hone kā

kitnī kashtiyāñ ubhrīñ mere Duub jaane se

sub.h muskurātī hai shaam muskurātī hai

tere muskurāne se mere muskurāne se

yād-e-ahd-e-rafta se zindagī ibārat hai

sub.h-e-nau ko nisbat hai shaam ke fasāne se

ab unheñ kahāñ DhūñDeñ ab unheñ kahāñ paa.eñ

haa.e daaġh de kar jo uTh ga.e zamāne se

ik taraf banātā hai ik taraf miTātā hai

khel kheltā hai tū nit nayā zamāne se

umr ik guzārī hai ham ne sehn-e-gulshan meñ

jaa.eñ to kahāñ jaa.eñ uḌ ke āshiyāne se

kā.enāt raqsāñ hai zindagī daraḳhshāñ hai

kis ke muskurāne se tere muskurāne se

vāsta imārat se kyā niyāz-mandī ko

kyuuñ jabīñ ho sharminda dar se āstāne se

ye añdherī rātoñ meñ aur bhī farozāñ haiñ

nisbateñ haiñ tāroñ ko tere muskurāne se

zindagī kī manzil meñ ab qadam nahīñ uThte

niiñd aao ik le leñ maut ke bahāne se

indimāl jin kā hai vaqt se bhī nā-mumkin

zaḳhm chand aise bhī khaa.e haiñ zamāne se

jis tarah añdhere meñ shab ko deñ faroġh anjum

zulmateñ munavvar haiñ mere muskurāne se

maut se shikāyat kyuuñ maut se gilā kaisā

zindagī ne luuTā hai maut ke bahāne se

marg-o-zīst meñ 'tālib' kyā ḳhabar kise ma.alūm

kis ne kis ko luuTā hai aur kis bahāne se

shairi ibarat hai 'dagh' ke gharane se

luT rahi hai ye daulat us bhare KHazane se

gham nahin zara mujh ko gharq-e-bahr hone ka

kitni kashtiyan ubhrin mere Dub jaane se

subh muskuraati hai sham muskuraati hai

tere muskurane se mere muskurane se

yaad-e-ahd-e-rafta se zindagi ibarat hai

subh-e-nau ko nisbat hai sham ke fasane se

ab unhen kahan DhunDen ab unhen kahan paen

hae dagh de kar jo uTh gae zamane se

ek taraf banata hai ek taraf miTata hai

khel khelta hai tu nit naya zamane se

umr ek guzari hai hum ne sehn-e-gulshan mein

jaen to kahan jaen uD ke aashiyane se

kaenat raqsan hai zindagi daraKHshan hai

kis ke muskurane se tere muskurane se

wasta imarat se kya niyaz-mandi ko

kyun jabin ho sharminda dar se aastane se

ye andheri raaton mein aur bhi farozan hain

nisbaten hain taron ko tere muskurane se

zindagi ki manzil mein ab qadam nahin uThte

nind aao ek le len maut ke bahane se

indimal jin ka hai waqt se bhi na-mumkin

zaKHm chand aise bhi khae hain zamane se

jis tarah andhere mein shab ko den farogh anjum

zulmaten munawwar hain mere muskurane se

maut se shikayat kyun maut se gila kaisa

zindagi ne luTa hai maut ke bahane se

marg-o-zist mein 'talib' kya KHabar kise malum

kis ne kis ko luTa hai aur kis bahane se