shaKH tinke ko likha shoale ko jhonka likh diya

shāḳh tinke ko likhā sho.ale ko jhoñkā likh diyā

maiñ ġhazal kahne lagā lekin qasīda likh diyā

paḌhtī rahtī haiñ ḳhalāoñ ko mirī bīnā.iyāñ

tū ne in aurāq par mere ḳhudā kyā likh diyā

kis kī sāñseñ mere hāthoñ kī lakīreñ ban ga.iiñ

kis ne mere aa.ine meñ apnā chehra likh diyā

kis kī ḳhushbū se mahak uTThīñ mirī tanhā.iyāñ

kis ne vīrāne meñ qismat kā tamāshā likh diyā

maiñ jahāñ Duubā vahāñ buniyād-e-sāhil paḌ ga.ī

āḳhirī sāñsoñ ne paanī par jazīra likh diyā

zindagī ko uḌte lamhoñ ke kafan meñ Dhāñp kar

sañg-e-mustaqbil pe maiñ ne apnā katba likh diyā

yuuñ mukammal kī hai 'najmī' maiñ ne apnī dāstāñ

jis jagah bhī rabt TuuTā naam us kā likh diyā

shaKH tinke ko likha shoale ko jhonka likh diya

main ghazal kahne laga lekin qasida likh diya

paDhti rahti hain KHalaon ko meri binaiyan

tu ne in auraq par mere KHuda kya likh diya

kis ki sansen mere hathon ki lakiren ban gain

kis ne mere aaine mein apna chehra likh diya

kis ki KHushbu se mahak uTThin meri tanhaiyan

kis ne virane mein qismat ka tamasha likh diya

main jahan Duba wahan buniyaad-e-sahil paD gai

aaKHiri sanson ne pani par jazira likh diya

zindagi ko uDte lamhon ke kafan mein Dhanp kar

sang-e-mustaqbil pe main ne apna katba likh diya

yun mukammal ki hai 'najmi' main ne apni dastan

jis jagah bhi rabt TuTa nam us ka likh diya