shaKHen tarash kar mujhe mahdud mat karo

shāḳheñ tarāsh kar mujhe mahdūd mat karo

chhāñv ghane chinār kī nābūd mat karo

insāñ huuñ gunahgār huuñ to mujh ko do sazā

mujh ko sipurd-e-ḳhvāhish-e-ma.abūd mat karo

shīshe meñ dekh kar zarā pahchān lo mujhe

ḳhākoñ meñ apne jalvoñ ko mahdūd mat karo

ham sab ne kitne pyaar se duniyā sañvār dī

is par ḳhudā-rā bārish-e-bārūd mat karo

ho raushnī shu.ūr kī aur dil kī chāñdnī

ai dost is ko tīrgī-e-dūd mat karo

shaKHen tarash kar mujhe mahdud mat karo

chhanw ghane chinar ki nabud mat karo

insan hun gunahgar hun to mujh ko do saza

mujh ko sipurd-e-KHwahish-e-mabud mat karo

shishe mein dekh kar zara pahchan lo mujhe

KHakon mein apne jalwon ko mahdud mat karo

hum sab ne kitne pyar se duniya sanwar di

is par KHuda-ra barish-e-barud mat karo

ho raushni shuur ki aur dil ki chandni

ai dost is ko tirgi-e-dud mat karo