shaki bad-zan aazurda hain mujhse mere bhai yar

shākī bad-zan āzurda haiñ mujh se mere bhaa.ī yaar

jaane kis jā bhuul aayā huuñ rakh kar maiñ goyā.ī yaar

ḳhāmoshī ke sahrā chuTkī meñ āvāzoñ ke jañgal

kitnī bastī ujḌī ham se kitnī ham ne basā.ī yaar

dekho nā-ummīdī ko aise Theñgā dikhlāte haiñ

aksar apne ghar kī kunDī ḳhud ham ne khaTkā.ī yaar

tanhā.ī meñ ab bhī koī bāloñ ko sahlātā hai

haath pakaḌnā chāheñ to ThaTThā maare purvā.ī yaar

aaj use phir dekhā jis ko pahroñ dekhā karte the

ab kuchh vo bhī maand paḌā hai kuchh apnī bīnā.ī yaar

achchhī bastī achchhā ghar achchhe bachche achchhe hālāt

jis ke dekho saath lagī hai ik ḳhvāhish ābā.ī yaar

ma.anī kī dhajjī bikhrī aur lafzoñ ke taane baane

raat taḳhayyul ne mastī meñ kī hañgām-ārā.ī yaar

shaki bad-zan aazurda hain mujh se mere bhai yar

jaane kis ja bhul aaya hun rakh kar main goyai yar

KHamoshi ke sahra chuTki mein aawazon ke jangal

kitni basti ujDi hum se kitni hum ne basai yar

dekho na-ummidi ko aise Thenga dikhlate hain

aksar apne ghar ki kunDi KHud hum ne khaTkai yar

tanhai mein ab bhi koi baalon ko sahlata hai

hath pakaDna chahen to ThaTTha mare purwai yar

aaj use phir dekha jis ko pahron dekha karte the

ab kuchh wo bhi mand paDa hai kuchh apni binai yar

achchhi basti achchha ghar achchhe bachche achchhe haalat

jis ke dekho sath lagi hai ek KHwahish aabai yar

mani ki dhajji bikhri aur lafzon ke tane bane

raat taKHayyul ne masti mein ki hangam-arai yar