sham aaegi to andaz nirale honge

shaam aa.egī to andāz nirāle hoñge

terī yādoñ ke har ik samt ujāle hoñge

maiñ thī ik peḌ havā le ga.ī sūkhe patte

mujh pe ai fasl-e-ḳhizāñ tere maqāle hoñge

shāh-rāhoñ pe jo kal DhūñD rahā thā ḳhushiyāñ

qahqahe us ne havāoñ meñ uchhāle hoñge

be-ḳhatāoñ kī ye pahchān bahut āsāñ hai

apne kāñdhoñ pe salīb apnī sañbhāle hoñge

us ke dāman meñ jo motī haiñ to hairānī kyoñ

ye samundar bhī usī ne to khañgāle hoñge

maañ nigahdāsht kare jaise kisī bachche kī

us ne ġham bhī usī andāz se paale hoñge

koī gulshan na khilā paa.e sar-e-rāh-e-vafā

mujh se sharminda mire paañv ke chhāle hoñge

kuchh na kahne pe ḳhafā kah duuñ to jaane kyā ho

lab pe taale usī ehsās ne Daale hoñge

'mīr'-o-'ġhālib' kī zabāñ dekhegī vo din bhī 'nasīm'

sab ke hāthoñ meñ jab urdu ke risāle hoñge

sham aaegi to andaz nirale honge

teri yaadon ke har ek samt ujale honge

main thi ek peD hawa le gai sukhe patte

mujh pe ai fasl-e-KHizan tere maqale honge

shah-rahon pe jo kal DhunD raha tha KHushiyan

qahqahe us ne hawaon mein uchhaale honge

be-KHataon ki ye pahchan bahut aasan hai

apne kandhon pe salib apni sanbhaale honge

us ke daman mein jo moti hain to hairani kyon

ye samundar bhi usi ne to khangale honge

man nigahdasht kare jaise kisi bachche ki

us ne gham bhi usi andaz se pale honge

koi gulshan na khila pae sar-e-rah-e-wafa

mujh se sharminda mere panw ke chhaale honge

kuchh na kahne pe KHafa kah dun to jaane kya ho

lab pe tale usi ehsas ne Dale honge

'mir'-o-'ghaalib' ki zaban dekhegi wo din bhi 'nasim'

sab ke hathon mein jab urdu ke risale honge