sham aai to ba-har-samt numudar hua

shaam aa.ī to ba-har-samt numūdār huā

tujh se achchhā to tirā sāya-e-dīvār huā

ik tirī yaad ki mānind-e-sahar raushan hai

ik tirā naam ki mujh ko abad-āsār huā

jab maiñ soyā to rakhā us ne mire haath pe haath

baḳht-e-kam-baḳht bhī kis vaqt pe bedār huā

ek saa.il hai tire dar kā sabhī jānte haiñ

haañ vahī shaḳhs ki jo gaañv kā sardār huā

tū ne is ishq meñ paa.ī hai bahut sī daulat

mujh sā nādār to le-de ke qalamkār huā

din ko chamgādaḌeñ jo dekh nahīñ paatī haiñ

ai ḳhudā in ko to sūraj tirā be-kār huā

saḳht jaaḌe kī aziyyat se nikal aayā huuñ

aap ke jism kī hiddat se mujhe pyaar huā

aap ke husn-e-fusūñ-sāz ke kyā kahne haiñ

aa.ina dekh ke hairat meñ giraftār huā

us ne us paar bulāyā hai ka.ī baar 'valī'

aur dariyā ki nahīñ mujh se kabhī paar huā

sham aai to ba-har-samt numudar hua

tujh se achchha to tera saya-e-diwar hua

ek teri yaad ki manind-e-sahar raushan hai

ek tera nam ki mujh ko abad-asar hua

jab main soya to rakha us ne mere hath pe hath

baKHt-e-kam-baKHt bhi kis waqt pe bedar hua

ek sail hai tere dar ka sabhi jaante hain

han wahi shaKHs ki jo ganw ka sardar hua

tu ne is ishq mein pai hai bahut si daulat

mujh sa nadar to le-de ke qalamkar hua

din ko chamgadaDen jo dekh nahin pati hain

ai KHuda in ko to suraj tera be-kar hua

saKHt jaDe ki aziyyat se nikal aaya hun

aap ke jism ki hiddat se mujhe pyar hua

aap ke husn-e-fusun-saz ke kya kahne hain

aaina dekh ke hairat mein giraftar hua

us ne us par bulaya hai kai bar 'wali'

aur dariya ki nahin mujh se kabhi par hua