sham-e-gham jab dar-ba-dar ho jaegi

shām-e-ġham jab dar-ba-dar ho jā.egī

vaqt se pahle sahar ho jā.egī

dil kī dhaḌkan kā sahārā chāhiye

aah pāband-e-asar ho jā.egī

aap chalne kā irāda to kareñ

saarī duniyā ham-safar ho jā.egī

Daal to diije nasheman kī binā

barq ko ḳhud hī ḳhabar ho jā.egī

apnī aahoñ par bharosā hai mujhe

jab maiñ chāhūñgā sahar ho jā.egī

muskurāne se na hogā aur kuchh

fitrat-e-ġham mo'atabar ho jā.egī

dāstāñ kā muḳhtasar honā hī kyā

muskurā do muḳhtasar ho jā.egī

rahm aa hī jā.egā un ko 'sa.īd'

shām-e-ġham kī bhī sahar ho jā.egī

sham-e-gham jab dar-ba-dar ho jaegi

waqt se pahle sahar ho jaegi

dil ki dhaDkan ka sahaara chahiye

aah paband-e-asar ho jaegi

aap chalne ka irada to karen

sari duniya ham-safar ho jaegi

Dal to dije nasheman ki bina

barq ko KHud hi KHabar ho jaegi

apni aahon par bharosa hai mujhe

jab main chahunga sahar ho jaegi

muskurane se na hoga aur kuchh

fitrat-e-gham mo'atabar ho jaegi

dastan ka muKHtasar hona hi kya

muskura do muKHtasar ho jaegi

rahm aa hi jaega un ko 'said'

sham-e-gham ki bhi sahar ho jaegi