sham-e-gham se shab-e-andoh se chashm-e-tar se

shām-e-ġham se shab-e-andoh se chashm-e-tar se

baaz aayā maiñ tirī yaad ke us lashkar se

yaañ shab-o-roz hai matlab kise ḳhair-o-shar se

zindagī kā hai ajab silsila sīm-o-zar se

jo tujhe chāhā batānā na batāyā phir bhī

kab chhupā hāl-e-dil-e-soḳhta nāma-bar se

ba.ad-e-takmīl huī ghar kī haqīqat ma.alūm

ghar kahāñ bantā hai dīvār se chhat se dar se

mehrbānoñ meñ tirā naam to likkhā hai magar

ḳhuub vāqif huuñ mirī jaan tire tevar se

sar bachātā huuñ to phir paañv nikal jaate haiñ

aib iflās kā chhuptā hī nahīñ chādar se

hirs kī dauḌ se rahtā huuñ alag ai 'anjum'

faiz pahuñchā hai mujhe dars-e-gah-e'qaisar' se

sham-e-gham se shab-e-andoh se chashm-e-tar se

baz aaya main teri yaad ke us lashkar se

yan shab-o-roz hai matlab kise KHair-o-shar se

zindagi ka hai ajab silsila sim-o-zar se

jo tujhe chaha batana na bataya phir bhi

kab chhupa haal-e-dil-e-soKHta nama-bar se

baad-e-takmil hui ghar ki haqiqat malum

ghar kahan banta hai diwar se chhat se dar se

mehrbanon mein tera nam to likkha hai magar

KHub waqif hun meri jaan tere tewar se

sar bachata hun to phir panw nikal jate hain

aib iflas ka chhupta hi nahin chadar se

hirs ki dauD se rahta hun alag ai 'anjum'

faiz pahuncha hai mujhe dars-e-gah-e'qaisar' se