sham-e-hijran jo kaTi subh-e-qayamat aai

shām-e-hijrāñ jo kaTī sub.h-e-qayāmat aa.ī

ek balā sar se Talī ek musībat aa.ī

lab pe shikva tirā aaya na shikāyat aa.ī

jab kabhī dil meñ kuchh aaya ki mohabbat aa.ī

mujh pe rāhat-talabī se hai musībat aa.ī

un se fariyād jo kī aur qayāmat aa.ī

tire aage tirī bedād kī shohrat aa.ī

ġhair ko bhī to tirī chaah se nafrat aa.ī

al-amāñ kahte haiñ sab rakhte haiñ kānoñ par haath

merī fariyād se mahshar meñ qayāmat aa.ī

vasl kī shab dil-e-ḳhud-kām kī nākāmī ko

aap meñ sharm-o-hayā aur sharārat aa.ī

maiñ na kahtā thā burā mujh ko na dekheñge vo

chashm-e-fattāñ meñ phir āḳhir ko muravvat aa.ī

kaun hai mūnis-o-ġham-ḳhvār shab-e-ġham merā

paas aaya kabhī koī to kudūrat aa.ī

jaan kar tujh ko sitamgar bhī bhulā dil detā

mire aage ye mirī shūmī-e-qismat aa.ī

aaj kahte haiñ ki dekheñge tirā shor-o-fuġhāñ

apne hāthoñ se mire sar pe qayāmat aa.ī

pūchhte kyā ho tire hosh kahāñ aql kahāñ

jab taġhāful nahīñ aaya mujhe ġhaflat aa.ī

tire kushte tirī bedād ke āshiq to nahīñ

eid aa.ī unheñ jab sar pe qayāmat aa.ī

ik sivā maut ke aafat nahīñ baaqī koī

ab musībat mujhe kahtī hai ki rāhat aa.ī

tum ho dil meñ to bhalā ġhair koī kyoñ aa.e

ġhair kī yaad jo aa.ī mujhe ġhairat aa.ī

ġhair ko dekheñge aatā dar-e-jānāñ pe jo 'lutf'

us galī se bhī to chal deñge jo vahshat aa.ī

sham-e-hijran jo kaTi subh-e-qayamat aai

ek bala sar se Tali ek musibat aai

lab pe shikwa tera aaya na shikayat aai

jab kabhi dil mein kuchh aaya ki mohabbat aai

mujh pe rahat-talabi se hai musibat aai

un se fariyaad jo ki aur qayamat aai

tere aage teri bedad ki shohrat aai

ghair ko bhi to teri chah se nafrat aai

al-aman kahte hain sab rakhte hain kanon par hath

meri fariyaad se mahshar mein qayamat aai

wasl ki shab dil-e-KHud-kaam ki nakaami ko

aap mein sharm-o-haya aur shararat aai

main na kahta tha bura mujh ko na dekhenge wo

chashm-e-fattan mein phir aaKHir ko murawwat aai

kaun hai munis-o-gham-KHwar shab-e-gham mera

pas aaya kabhi koi to kudurat aai

jaan kar tujh ko sitamgar bhi bhula dil deta

mere aage ye meri shumi-e-qismat aai

aaj kahte hain ki dekhenge tera shor-o-fughan

apne hathon se mere sar pe qayamat aai

puchhte kya ho tere hosh kahan aql kahan

jab taghaful nahin aaya mujhe ghaflat aai

tere kushte teri bedad ke aashiq to nahin

eid aai unhen jab sar pe qayamat aai

ek siwa maut ke aafat nahin baqi koi

ab musibat mujhe kahti hai ki rahat aai

tum ho dil mein to bhala ghair koi kyon aae

ghair ki yaad jo aai mujhe ghairat aai

ghair ko dekhenge aata dar-e-jaanan pe jo 'lutf'

us gali se bhi to chal denge jo wahshat aai