sham-e-wada gah rona gah hansna dekhte

shām-e-va.ada gaah ronā gaah hañsnā dekhte

aap to aa.e nahīñ varna tamāshā dekhte

hausla dil kā uThā kar tum ye pardā dekhte

jazb kar lete tumheñ apne meñ itnā dekhte

apnī sūrat apnā partav apnā jalva dekhte

aap dil ko toḌ dete to tamāshā dekhte

diid kī hasrat thī muusā zauq-e-nazzāra na thā

varna apne aa.ine meñ un kā jalva dekhte

ḳhud baḌhe the vo hamārī samt paimāna-ba-kaf

dekhte un kā karam yā rū-e-tauba dekhte

chaar din meñ apnī sūrat hī na pahchānī ga.ī

ham kahāñ se zindagī laate ki duniyā dekhte

sar jhukā kar le gayā gardan pe ḳhud ḳhūn-e-vafā

kis tarah chehre se un ke rang uḌtā dekhte

rok lī chullū meñ tauba toḌ kar be-iḳhtiyār

haa.e kin āñkhoñ se ham sāġhar chhalaktā dekhte

kaash jo anjām-e-mūsā par haiñ nāzāñ ai 'habīb'

ek din merā bhī vo zauq-e-nazāra dekhte

sham-e-wada gah rona gah hansna dekhte

aap to aae nahin warna tamasha dekhte

hausla dil ka uTha kar tum ye parda dekhte

jazb kar lete tumhein apne mein itna dekhte

apni surat apna partaw apna jalwa dekhte

aap dil ko toD dete to tamasha dekhte

did ki hasrat thi musa zauq-e-nazzara na tha

warna apne aaine mein un ka jalwa dekhte

KHud baDhe the wo hamari samt paimana-ba-kaf

dekhte un ka karam ya ru-e-tauba dekhte

chaar din mein apni surat hi na pahchani gai

hum kahan se zindagi late ki duniya dekhte

sar jhuka kar le gaya gardan pe KHud KHun-e-wafa

kis tarah chehre se un ke rang uDta dekhte

rok li chullu mein tauba toD kar be-iKHtiyar

hae kin aankhon se hum saghar chhalakta dekhte

kash jo anjam-e-musa par hain nazan ai 'habib'

ek din mera bhi wo zauq-e-nazara dekhte