sham hai shor hai lashkari mujhko ghere hain is shahr mein

shaam hai shor hai lashkarī mujh ko ghere haiñ is shahr meñ

aur maiñ sochtā huuñ ki sab log mere haiñ is shahr meñ

sehn-e-ālam meñ ik dūrbīñ se ulajhtā huuñ maiñ raat bhar

kahkashā.eñ haiñ yā jugnuoñ ke basere haiñ is shahr meñ

din kī ūñchī fasīloñ ne pahle to sūraj ko andhā kiyā

aur ab raat kā vaqt hai bas añdhere haiñ is shahr meñ

koh-e-afsurdagī shahr-e-jāñ tere dāman meñ ābād hai

kuchh parindoñ ke aur kuchh faqīroñ ke Dere haiñ is shahr meñ

bhairvīñ ke suroñ meñ bhajan gungunāte hue shaam ne

āsmāñ kī ridā par sitāre bikhere haiñ is shahr meñ

ik tilā.ī chamak se banā hai ye duniyā kā jādū-nagar

ik parī-zād ke 'āshiqoñ ke basere haiñ is shahr meñ

rang raqsāñ haiñ aur kuchh basantī patañgeñ haiñ lahore kī

kyā dhanak mū-qalam ik musavvir ne phere haiñ is shahr meñ

sham hai shor hai lashkari mujh ko ghere hain is shahr mein

aur main sochta hun ki sab log mere hain is shahr mein

sehn-e-alam mein ek durbin se ulajhta hun main raat bhar

kahkashaen hain ya jugnuon ke basere hain is shahr mein

din ki unchi fasilon ne pahle to suraj ko andha kiya

aur ab raat ka waqt hai bas andhere hain is shahr mein

koh-e-afsurdagi shahr-e-jaan tere daman mein aabaad hai

kuchh parindon ke aur kuchh faqiron ke Dere hain is shahr mein

bhairwin ke suron mein bhajan gungunate hue sham ne

aasman ki rida par sitare bikhere hain is shahr mein

ek tilai chamak se bana hai ye duniya ka jadu-nagar

ek pari-zad ke 'ashiqon ke basere hain is shahr mein

rang raqsan hain aur kuchh basanti patangen hain lahore ki

kya dhanak mu-qalam ek musawwir ne phere hain is shahr mein