sham ke bagh mein dil-nashin chahchahe surKH-ru shaKH-saron mein gum ho gae

shaam ke baaġh meñ dil-nashīñ chahchahe surḳh-rū shāḳh-sāroñ meñ gum ho ga.e

chāñd niklā mire dekhte dekhte do parinde chanāroñ meñ gum ho ga.e

chāñdnī khil uThī dasht ḳhāmosh thā kārvāñ mere gītoñ se mad.hosh thā

ret ke mausamoñ ne pukārā magar sārbāñ lāla-zāroñ maiñ gum ho ga.e

aag dekhī jazīre pe jaltī huī ziist jaagī kahīñ aañkh maltī huī

tez lahroñ pe kashtī machalne lagī aur musāfir sharāroñ maiñ gum ho ga.e

ek lashkar havā kā dikhā.ī diyā sūkhī shāḳhoñ kā nauha sunā.ī diyā

zard peḌoñ se patte bichhaḌte hue mātamī rahguzāroñ meñ gum ho ga.e

hijr kī vādiyoñ se guzarte hue shāhzāde ne dekhā ThiThurte hue

us parī kī judā.ī meñ kohsār bhī dūdhiyā barf-zāroñ meñ gum ho ga.e

yuuñ kināroñ kā manzar badalne lagā ḳhema-e-ḳhvāb tezī se jalne lagā

niiñd kī ābjūoñ meñ bahte hue do diye ābshāroñ meñ gum ho ga.e

zard āñkhoñ ke jangal meñ āzār thā barg-e-dil raushnī kā talab-gār thā

be-karāñ tīrgī meñ phisalte hue mere aañsū sitāroñ meñ gum ho ga.e

sham ke bagh mein dil-nashin chahchahe surKH-ru shaKH-saron mein gum ho gae

chand nikla mere dekhte dekhte do parinde chanaron mein gum ho gae

chandni khil uThi dasht KHamosh tha karwan mere giton se madhosh tha

ret ke mausamon ne pukara magar sarban lala-zaron main gum ho gae

aag dekhi jazire pe jalti hui zist jagi kahin aankh malti hui

tez lahron pe kashti machalne lagi aur musafir shararon main gum ho gae

ek lashkar hawa ka dikhai diya sukhi shaKHon ka nauha sunai diya

zard peDon se patte bichhaDte hue matami rahguzaron mein gum ho gae

hijr ki wadiyon se guzarte hue shahzade ne dekha ThiThurte hue

us pari ki judai mein kohsar bhi dudhiya barf-zaron mein gum ho gae

yun kinaron ka manzar badalne laga KHema-e-KHwab tezi se jalne laga

nind ki aabjuon mein bahte hue do diye aabshaaron mein gum ho gae

zard aankhon ke jangal mein aazar tha barg-e-dil raushni ka talab-gar tha

be-karan tirgi mein phisalte hue mere aansu sitaron mein gum ho gae