sham ke Dhalte suraj ne ye baat mujhe samjhai hai

shaam ke Dhalte sūraj ne ye baat mujhe samjhā.ī hai

tārīkī meñ dekh sakūñ to āñkhoñ meñ bīnā.ī hai

ehsāsāt kī tah tak jaanā kitnā mushkil hotā hai

zehn-o-dil meñ jitnā utro utnī hī gahrā.ī hai

rishte-nāte bāhar se to jism ko ghere baiThe haiñ

ruuh ke andar jhāñk ke dekho mīloñ tak tanhā.ī hai

lafzoñ ne hī nashtar ban ke dil ko gahre zaḳhm diye

lafzoñ ne hī zaḳhm-e-dil ko ThanDak bhī pahuñchā.ī hai

piiTh pe kartā vaar to shāyad meñ sadme se mar jaatā

maiñ to ḳhush huuñ maiñ ne us se choT jigar pe khaa.ī hai

kamroñ ke baTvāre meñ ik kamrā zaa.id jaane do

lekin ye ehsās bachā lo apnā hī to bhaa.ī hai

diip jalā kar duniyā vaale is tiilī ko bhuul ga.e

lekin sach hai dīpak raushan kartī diyā-salā.ī hai

majzūboñ ke khel samajhnā sab ke bas kī baat nahīñ

pahle zaḳhm udheḌ ke jaanā phir us kī turpāī hai

rāteñ apnī raushan kar lo ashkoñ se 'shāyān' abhī

vaqt se pahle apne safar kī tayyārī dānā.ī hai

sham ke Dhalte suraj ne ye baat mujhe samjhai hai

tariki mein dekh sakun to aankhon mein binai hai

ehsasat ki tah tak jaana kitna mushkil hota hai

zehn-o-dil mein jitna utro utni hi gahrai hai

rishte-nate bahar se to jism ko ghere baiThe hain

ruh ke andar jhank ke dekho milon tak tanhai hai

lafzon ne hi nashtar ban ke dil ko gahre zaKHm diye

lafzon ne hi zaKHm-e-dil ko ThanDak bhi pahunchai hai

piTh pe karta war to shayad mein sadme se mar jata

main to KHush hun main ne us se choT jigar pe khai hai

kamron ke baTware mein ek kamra zaid jaane do

lekin ye ehsas bacha lo apna hi to bhai hai

dip jala kar duniya wale is tili ko bhul gae

lekin sach hai dipak raushan karti diya-salai hai

majzubon ke khel samajhna sab ke bas ki baat nahin

pahle zaKHm udheD ke jaana phir us ki turpai hai

raaten apni raushan kar lo ashkon se 'shayan' abhi

waqt se pahle apne safar ki tayyari danai hai