sham ki shaKH-e-shikasta barqarar-e-naghma hai

shaam kī shāḳh-e-shikasta barqarār-e-naġhma hai

matla-e-ḳhāmosh se utrī qatār-e-naġhma hai

rang sīñchā yā kisī ne sur bikherā chaar sū

parda-e-pardāz par naqsh-o-nigār-e-naġhma hai

ābshār-e-ḳhāmushī hai kohsāroñ se udhar

ḳhāksāroñ ke yahāñ jo intizār-e-naġhma hai

thartharātī sarsarātī sansanātī sā'ato

tham raho is rāste par shahsavār-e-naġhma hai

rang sā yā raag sā pahchāniyo ye baaġh sā

hū ke 'ālam meñ yahī parvardigār-e-naġhma hai

shash-jihat ke is chhatāre se kashākash hī sahī

kahne ko in ungliyoñ ko iḳhtiyār-e-naġhma hai

bujhne vaale ab bujheñge larzish-e-mastāna se

yā'nī in afsurdagāñ ko e'tibār-e-naġhma hai

sham ki shaKH-e-shikasta barqarar-e-naghma hai

matla-e-KHamosh se utri qatar-e-naghma hai

rang sincha ya kisi ne sur bikhera chaar su

parda-e-pardaz par naqsh-o-nigar-e-naghma hai

aabshaar-e-KHamushi hai kohsaron se udhar

KHaksaron ke yahan jo intizar-e-naghma hai

thartharaati sarsaraati sansanati sa'ato

tham raho is raste par shahsawar-e-naghma hai

rang sa ya rag sa pahchaniyo ye bagh sa

hu ke 'alam mein yahi parwardigar-e-naghma hai

shash-jihat ke is chhatare se kashakash hi sahi

kahne ko in ungliyon ko iKHtiyar-e-naghma hai

bujhne wale ab bujhenge larzish-e-mastana se

ya'ni in afsurdagan ko e'tibar-e-naghma hai