sham-o-sahar har ek ghaDi is ka KHayal to na kar

shām-o-sahar har ik ghaḌī is kā ḳhayāl to na kar

apnī hayāt-e-muḳhtasar vaqf-e-malāl to na kar

zaḳhm ke indimāl ko us kī razā pe chhoḌ de

marham-e-lutf ke liye us se savāl na kar

kār-gah-e-hayāt meñ sabr-o-sukūñ se kaam le

jo tujhe mil nahīñ sakā us kā malāl to na kar

ġham kī har ek dāstāñ shauq se kar bayāñ magar

hijr ke māh-o-sāl meñ zikr-e-visāl to na kar

apne kamāl-e-shauq kā kar na kisī se tazkira

ġhair ko ġhair hī samajh vāqif-e-hāl to na kar

us se vafā talab na kar vo to jafā-pasand hai

apnā dayār-e-shauq meñ jiinā muhāl to na kar

sham-o-sahar har ek ghaDi is ka KHayal to na kar

apni hayat-e-muKHtasar waqf-e-malal to na kar

zaKHm ke indimal ko us ki raza pe chhoD de

marham-e-lutf ke liye us se sawal na kar

kar-gah-e-hayat mein sabr-o-sukun se kaam le

jo tujhe mil nahin saka us ka malal to na kar

gham ki har ek dastan shauq se kar bayan magar

hijr ke mah-o-sal mein zikr-e-visal to na kar

apne kamal-e-shauq ka kar na kisi se tazkira

ghair ko ghair hi samajh waqif-e-haal to na kar

us se wafa talab na kar wo to jafa-pasand hai

apna dayar-e-shauq mein jina muhaal to na kar