sham pariyon se bhari thi raat chup hai jhil ki

shaam pariyoñ se bharī thī raat chup hai jhiil kī

gung kartī hai zabānoñ ko du'ā takmīl kī

naam chamkā mere dil meñ sūra-e-rahmān kā

puurī sūrat sub.h-e-ḳhush-hangām ne tartīl kī

jaise kī mausūl āġhāz-e-mohabbat kī du'ā

ham ne agloñ tak vo rahmat kī havā tarsīl kī

vāqi'a aisā na thā jaise kiyā ham ne bayān

ruup se behtar kahīñ us ruup kī tafsīl kī

ab yahāñ aa kar nahīñ mā'lūm hotā rah-guzar

chhoḌ dī thī kis jagah par kis jagah tabdīl kī

'uzr jo bhī thā mafar karnā gavārā hī na thā

hukm jis kā bhī thā tere naam par tā'mīl kī

is ġhubār-e-dahr se us ne uThāyā rāsta

ye ḳhayāl-afroz mujh par shā'irī tafsīl kī

ai jahān-e-misr ye nairangiyoñ kā vaqt hai

ai zuleḳhā ḳhush-ḳhabar ai mauj āb-e-nīl kī

baaz aise to nahīñ aa kar utartā haath par

ratjage kaaTe ka.ī to ḳhvāb kī tashkīl kī

sham pariyon se bhari thi raat chup hai jhil ki

gung karti hai zabanon ko du'a takmil ki

nam chamka mere dil mein sura-e-rahman ka

puri surat subh-e-KHush-hangam ne tartil ki

jaise ki mausul aaghaz-e-mohabbat ki du'a

hum ne aglon tak wo rahmat ki hawa tarsil ki

waqi'a aisa na tha jaise kiya hum ne bayan

rup se behtar kahin us rup ki tafsil ki

ab yahan aa kar nahin ma'lum hota rah-guzar

chhoD di thi kis jagah par kis jagah tabdil ki

'uzr jo bhi tha mafar karna gawara hi na tha

hukm jis ka bhi tha tere nam par ta'mil ki

is ghubar-e-dahr se us ne uThaya rasta

ye KHayal-afroz mujh par sha'iri tafsil ki

ai jahan-e-misr ye nairangiyon ka waqt hai

ai zuleKHa KHush-KHabar ai mauj aab-e-nil ki

baz aise to nahin aa kar utarta hath par

ratjage kaTe kai to KHwab ki tashkil ki