sham se tanha khaDa hun yas ka paikar hun main

shaam se tanhā khaḌā huuñ yaas kā paikar huuñ maiñ

ajnabī huuñ aur fasīl-e-shahr se bāhar huuñ maiñ

tū to aayā hai yahāñ par qahqahoñ ke vāste

dekhne vaale baḌā ġhamgīn sā manzar huuñ maiñ

maiñ bachā lūñgā tujhe duniyā ke sard-o-garm se

Dhāñp le mujh se badan apnā tirī chādar huuñ maiñ

ab to milte haiñ havā se bhī dar-o-dīvār-e-jism

bāsiyo mujh se nikal jaao shikasta-ghar huuñ maiñ

maiñ tumheñ uḌte hue dekhūñgā mere sāthiyo

maiñ tumhārā saath kaise duuñ shikasta-par huuñ maiñ

mere hone kā pata le lo dar-o-dīvār se

kah rahā hai ghar kā sannāTā abhī andar huuñ maiñ

kaun degā ab yahāñ se terī dastak kā javāb

kis liye mujh ko sadā detā hai ḳhālī ghar huuñ maiñ

sham se tanha khaDa hun yas ka paikar hun main

ajnabi hun aur fasil-e-shahr se bahar hun main

tu to aaya hai yahan par qahqahon ke waste

dekhne wale baDa ghamgin sa manzar hun main

main bacha lunga tujhe duniya ke sard-o-garm se

Dhanp le mujh se badan apna teri chadar hun main

ab to milte hain hawa se bhi dar-o-diwar-e-jism

basiyo mujh se nikal jao shikasta-ghar hun main

main tumhein uDte hue dekhunga mere sathiyo

main tumhaara sath kaise dun shikasta-par hun main

mere hone ka pata le lo dar-o-diwar se

kah raha hai ghar ka sannaTa abhi andar hun main

kaun dega ab yahan se teri dastak ka jawab

kis liye mujh ko sada deta hai KHali ghar hun main