sham tak aisa thakan se chur ho jata hun main

shaam tak aisā thakan se chuur ho jaatā huuñ maiñ

jism se bānu-e-shab kāfūr ho jaatā huuñ maiñ

tere jalvoñ se kabhī jab duur ho jaatā huuñ maiñ

apnī āñkhoñ ke liye be-nūr ho jaatā huuñ maiñ

log ho jaate haiñ vāmiq log ho jaate haiñ qais

intihā-e-ishq meñ mansūr ho jaatā huuñ maiñ

chāhtā to huuñ karūñ ḳhalq-e-jahāñ par ġhaur-o-ḳhauz

dar-guzar ai rabb-e-kul mas.hūr ho jaatā huuñ maiñ

jab bhī suntā huuñ zabān-e-ġhair se apnī sifāt

sach kahūñ thoḌā bahut maġhrūr ho jaatā huuñ maiñ

merī āñkheñ kar rahī hotī haiñ jab dīdār-e-yār

apne paikar meñ sarāpā tuur ho jaatā huuñ maiñ

shahr meñ sāhib banā phirtā huuñ kis kis rang se

gaañv jā kar phir vahī mazdūr ho jaatā huuñ maiñ

mil hī jaatī hai hisār-e-dard se mujh ko najāt

phir hisār-e-dard meñ mahsūr ho jaatā huuñ maiñ

aadmī 'aḳhlāq' maiñ achchhā huuñ is meñ shak nahīñ

haañ kabhī hālāt se majbūr ho jaatā huuñ maiñ

sham tak aisa thakan se chur ho jata hun main

jism se banu-e-shab kafur ho jata hun main

tere jalwon se kabhi jab dur ho jata hun main

apni aankhon ke liye be-nur ho jata hun main

log ho jate hain wamiq log ho jate hain qais

intiha-e-ishq mein mansur ho jata hun main

chahta to hun karun KHalq-e-jahan par ghaur-o-KHauz

dar-guzar ai rabb-e-kul mashur ho jata hun main

jab bhi sunta hun zaban-e-ghair se apni sifat

sach kahun thoDa bahut maghrur ho jata hun main

meri aankhen kar rahi hoti hain jab didar-e-yar

apne paikar mein sarapa tur ho jata hun main

shahr mein sahib bana phirta hun kis kis rang se

ganw ja kar phir wahi mazdur ho jata hun main

mil hi jati hai hisar-e-dard se mujh ko najat

phir hisar-e-dard mein mahsur ho jata hun main

aadmi 'aKHlaq' main achchha hun is mein shak nahin

han kabhi haalat se majbur ho jata hun main