shana to chhuTa zulf-e-pareshan se ulajh kar

shāna to chhuTā zulf-e-pareshāñ se ulajh kar

suljhā na ye dil kākul-e-pechāñ se ulajh kar

letā hai ḳhabar kaun asīrān-e-balā kī

mar mar ga.e tārīkī-e-zindāñ se ulajh kar

zoroñ pe chaḌhā hai ye mirā panja-e-vahshat

dāman se ulajhtā hai garebāñ se ulajh kar

dīvāne ḳhat-o-zulf ke saude kī lahar meñ

kyā kyā na bake sumbul-o-raihāñ se ulajh kar

āsār-e-qayāmat kahīñ jaldī ho numāyāñ

ghabrā.e hai jī ab shab-e-hijrāñ se ulajh kar

Dartā huuñ kahīñ taab nazākat se na khāve

mū-e-kamar us zulf-e-pareshāñ se ulajh kar

sau pech meñ aayā hai hamārā dil-e-sad-chāk

shāna kī tarah kākul-e-pechāñ se ulajh kar

girdāb-e-balā meñ dil-e-āshiq ko phañsāyā

baalī ne tirī zulf-e-pareshāñ se ulajh kar

tai kar ga.e sab kāba-e-maqsūd kī manzil

ik rah ga.e ham naḳhl-e-muġhīlāñ se ulajh kar

dauḌā huā jaatā hai raqīb us kī galī ko

yārab ye gire raste meñ dāmāñ se ulajh kar

jazb-e-dil-e-majnūñ ne kiyā kaam jo apnā

naaqa na rukā ḳhār-e-bayābāñ se ulajh kar

yārab maiñ use dekhūñ agar dīda-e-bad se

rah jaa.e nazar panja-e-mizhgāñ se ulajh kar

ai tīr-fagan bas hai yahī mujh ko tamannā

chhūTe na rag-e-jāñ tire paikāñ se ulajh kar

mat bahs raqībān-e-kaj-andesh se 'ġhāfil'

be-qadr na ho aise safīhāñ se ulajh kar

shana to chhuTa zulf-e-pareshan se ulajh kar

suljha na ye dil kakul-e-pechan se ulajh kar

leta hai KHabar kaun asiran-e-bala ki

mar mar gae tariki-e-zindan se ulajh kar

zoron pe chaDha hai ye mera panja-e-wahshat

daman se ulajhta hai gareban se ulajh kar

diwane KHat-o-zulf ke saude ki lahar mein

kya kya na bake sumbul-o-raihan se ulajh kar

aasar-e-qayamat kahin jaldi ho numayan

ghabrae hai ji ab shab-e-hijran se ulajh kar

Darta hun kahin tab nazakat se na khawe

mu-e-kamar us zulf-e-pareshan se ulajh kar

sau pech mein aaya hai hamara dil-e-sad-chaak

shana ki tarah kakul-e-pechan se ulajh kar

girdab-e-bala mein dil-e-ashiq ko phansaya

baali ne teri zulf-e-pareshan se ulajh kar

tai kar gae sab kaba-e-maqsud ki manzil

ek rah gae hum naKHl-e-mughilan se ulajh kar

dauDa hua jata hai raqib us ki gali ko

yarab ye gire raste mein daman se ulajh kar

jazb-e-dil-e-majnun ne kiya kaam jo apna

naqa na ruka KHar-e-bayaban se ulajh kar

yarab main use dekhun agar dida-e-bad se

rah jae nazar panja-e-mizhgan se ulajh kar

ai tir-fagan bas hai yahi mujh ko tamanna

chhuTe na rag-e-jaan tere paikan se ulajh kar

mat bahs raqiban-e-kaj-andesh se 'ghafil'

be-qadr na ho aise safihan se ulajh kar