shanon pe na zulfen bikhrao dekho ye shararat Thik nahin

shānoñ pe na zulfeñ bikhrāo dekho ye sharārat Thiik nahīñ

is roz qayāmat se pahle ik aur qayāmat Thiik nahīñ

ruḳh se na haTāo parde ko ye chāñd chhupā hī rahne do

jal jaa.e na saarā husn kahīñ sūraj kī tamāzat Thiik nahīñ

ai husn kī malika hosh meñ aa ye pyaar vafā sab rahne de

ham ḳhāna-ba-doshoñ kī ḳhātir mahloñ se baġhāvat Thiik nahīñ

ho jaa.eñ na TukḌe TukḌe sab āñkhoñ ke sunahre ḳhvāb tire

patthar kī havelī ke aage shīshe kī imārat Thiik nahīñ

ab maan bhī jā ai dil mere us phuul kī ḳhvāhish chhoḌ bhī de

jo phuul chaman kī zīnat ho us phuul kī hasrat Thiik nahīñ

jab jalte patangoñ ko dekhā 'dīdār' to ye ma.alūm huā

āġhāz-e-mohabbat Thiik to hai anjām-e-mohabbat Thiik nahīñ

shanon pe na zulfen bikhrao dekho ye shararat Thik nahin

is roz qayamat se pahle ek aur qayamat Thik nahin

ruKH se na haTao parde ko ye chand chhupa hi rahne do

jal jae na sara husn kahin suraj ki tamazat Thik nahin

ai husn ki malika hosh mein aa ye pyar wafa sab rahne de

hum KHana-ba-doshon ki KHatir mahlon se baghawat Thik nahin

ho jaen na TukDe TukDe sab aankhon ke sunahre KHwab tere

patthar ki haweli ke aage shishe ki imarat Thik nahin

ab man bhi ja ai dil mere us phul ki KHwahish chhoD bhi de

jo phul chaman ki zinat ho us phul ki hasrat Thik nahin

jab jalte patangon ko dekha 'didar' to ye malum hua

aaghaz-e-mohabbat Thik to hai anjam-e-mohabbat Thik nahin