shayad ab rudad-e-hunar mein aise bab likhe jaenge

shāyad ab rūdād-e-hunar meñ aise baab likhe jā.eñge

sāmne dariyā bahtā hogā log sarāb likhe jā.eñge

aaj to ḳhair añdherī rāteñ aur azaab likhe jā.eñge

ik din apnī galiyoñ meñ bhī kuchh mahtāb likhe jā.eñge

palkeñ yūñhī phuul chuneñgī āñkheñ yūñhī rañg baneñgī

dast-e-duā se dīda-e-nam tak ḳhvāb hī ḳhvāb likhe jā.eñge

nādim āñkheñ soch rahī haiñ kal tārīḳh savāl karegī

itnā qaht-e-mohabbat kyuuñ thā kyā asbāb likhe jā.eñge

yūñhī lahū-luhān nahīñ ham, tum bhī chalo is raah ko dekho

jo kāñTe qadmoñ meñ chubheñge saare gulāb likhe jā.eñge

kabhī kabhī ye dhyān aatā hai apne ba.ad bhī duniyā hogī

lekin kaisī duniyā hogī kaun se baab likhe jā.eñge

roz-e-azal dīvār pe merī bārish ke harfoñ se likhā thā

tere naam likhe jā.eñge jo sailāb likhe jā.eñge

shayad ab rudad-e-hunar mein aise bab likhe jaenge

samne dariya bahta hoga log sarab likhe jaenge

aaj to KHair andheri raaten aur azab likhe jaenge

ek din apni galiyon mein bhi kuchh mahtab likhe jaenge

palken yunhi phul chunengi aankhen yunhi rang banengi

dast-e-dua se dida-e-nam tak KHwab hi KHwab likhe jaenge

nadim aankhen soch rahi hain kal tariKH sawal karegi

itna qaht-e-mohabbat kyun tha kya asbab likhe jaenge

yunhi lahu-luhan nahin ham, tum bhi chalo is rah ko dekho

jo kanTe qadmon mein chubhenge sare gulab likhe jaenge

kabhi kabhi ye dhyan aata hai apne baad bhi duniya hogi

lekin kaisi duniya hogi kaun se bab likhe jaenge

roz-e-azal diwar pe meri barish ke harfon se likha tha

tere nam likhe jaenge jo sailab likhe jaenge